एजेन्सी – बंगलादेशका स्टार अलराउन्डर सकिब अल हसनले इन्डियन प्रिमियर लिग (आइपिएल) नखेल्ने भएका छन् । अन्तर्राष्ट्रिय ब्यस्तता र ब्यक्तिगत कारण आइपिएल २०२३ नखेल्ने उनले कोलकाता नाइट राइडर्सलाई जानकारी दिएका छन् । कोलकाताले आइपिएलबाट स्वीकृति प्राप्तपछि उनको स्थानमा अर्को खेलाडी खोज्नेछ।

कोलकातामा बंगलादेशका अर्का विकेटकिपर लिटन दास छन् । सकिब र लिटन दास मंगलबारदेखि सुरु भएको आयरल्यान्डसँगको टेस्ट खेलमा टोलीमा छन् । सकिब कप्तान हुँदा दास टोलीका प्रमुख ब्याटर तथा विकेटकिपर हुन् । बंगलादेशले अर्को महिना मे मा आयरल्यान्डसँगको तीन ओडिआई खेलको सिरिजको लागि इंग्ल्यान्ड भ्रमण गर्नेछ ।

आगमी अक्टोबर नोभेम्बरमा भारतमा एकदिवसीय विश्वकप हुनेछ । आयरल्यान्ड भ्रमणमा लिटन दास पनि हुनेछन् । पहिलो पटक अक्सनमा बिकेका दासले आइपिएल खेल्छन् वा खेल्दैनन् त्यो भने जनाएका छैनन् । गत डिसम्बरमा कोलकाताले सकिबलाई १ करोड ५० लाख भारु र लिटन दासलाई ५० लाख भारुमा किनेको थियो । लिटन पहिलो पटक आइपिएल अक्सनमा बिकेका थिए ।

कोलकाता पहिलो खेल खेलमा पन्जाब किंग्ससँग ७ रनले पराजित भएको थियो । कोलकाताले दोस्रो खेल बिहीबार रोयल च्यालेन्जर्स बेंगलोर र तेस्रो खेल आइतबार गुजरात टाइटन्ससँग खेल्नेछ । दासले बेंगलोरसँगको खेल गुमाउने पक्काछ । यदि टेस्ट पुरै पाँच दिन पुगेमा गुजरातसँगको खेल पनि गुमाउने छन् ।

२०११ मा आइपिएलमा डेब्यू गरेका सकिबले ७१ खेलमा २ अर्धशतकसहित ७ सय ९३ रन बनाउनुको साथै ६३ विकेट लिएका छन् । कोलकातासँग विदेशी खेलाडीमा सुनिल नारायण, आन्द्रे रसेल, रहमानउल्लाह गुरबाज, लोकी फर्गुसन, टिम साउथी, डेविड विजा र लिटन दास छन् ।