काठमाडौं (हाम्रो खेलकुद) – नेपाली क्रिकेट टोलीका तीव्र गतिका बलर करण केसीको उपचार चर्चित गायिका त्रिशाला गुरुङले गरेकी छिन् । कलंकीस्थित नेपाल नेशनल अस्पतालमा डाक्टर त्रिशालासहितको टोलीले मंगलबार करणको उपचार गरेका थिए ।

करणको बायाँ खुट्टामा नङ पुरिएको हुँदा सामान्य उपचार गरिएको डाक्टर अभिषेक सिंहले हाम्रो खेलकुदलाई जानकारी दिए । ‘करणको हिजो उपचार भएको हो । बायाँ खुट्टाको बुढी औंलाको नङ भित्र पुरिएको थियो । त्यसलाई काटेर निकालेको हो’, अभिषेकले भने ।

त्रिशाला नेपाल नेशनल अस्पतालमा कार्यरत चिकित्सक हुन् । ‘क्रिकेटरहरुको बायाँ खुट्टाको नङ पुरिने समस्या सामान्य नै हो । तर त्यसलाई समयमै निकालेन भने त्यसले समस्या गर्छ । समयमै निकालेन भने छेउछाउको मासु मर्नसक्छ । समयमा ननिकालेमा खेल नै गुमाउन सक्ने हुनसक्छ’, उनले भने ।

अभिषेकका अनुसार करणले ३-४ दिन विश्राम गरेपछि खेल्न सक्छन् । नेपालले एसिसी प्रिमियर कपको लागि शनिबार देखि प्रशिक्षण थालेको छ । नेपालले अर्को महिना घरेलु मैदान टियुमा हुने एसिसी प्रिमियर कपको उपाधि जित्न सके एसिया कपमा भारत र पाकिस्तानसँग खेल्न पाउँछ ।

एसिसी प्रिमियर कप वैशाख ५ देखि १८ गतेसम्म टियु र मुलपानी मैदानमा हुनेछ । नेपालको समूहमा ओमान, कतार, मलेसिया र साउदी अरेविया छन् । समूह बी मा युएई, हङकङ, कुवेत, सिंगापुर र बहराइन छन् ।

यस प्रतियोगिता विजेता टोलीले आगमी सेप्टेम्बरमा पाकिस्तानमा हुने एसिया कप खेल्न पाउनेछ । एसिया कपमा भारत र पाकिस्तानसँग खेल्न पाउनेछ ।

शीर्ष तीन टोलीले जुलाईमा हुने एसिसी इमर्जिङ टिम्स एसिया कप खेल्न पाउनेछन् । एसिया कपपछि नेपालले जुन जुलाईमा जिम्बावेमा हुने विश्वकप छनोटको तयारी गर्नेछ ।