एजेन्सी – इन्डियन प्रिमियर लिग (आइपिएल) को आठौं खेलमा आज राजस्थान रोयल्स र पन्जाब किंग्सबीच प्रतिस्पर्धा हुँदैछ । खेल नेपाली समय अनुसार साँझ ७ : ४५ मा गुवाहाटीमा सुरु हुनेछन् । दुबै टोली लगातार दोस्रो जितको सोचमा हुनेछन् । पहिलो खेलमा राजस्थान रोयल्सले सनराइजर्स हैदराबादमाथि ७२ रनको सहज जित हात पारेको थियो ।

पन्जाब किंग्सले कोलकाता नाइट राइडर्सलाई डकवर्थ लेविस पद्धतिको आधारमा ७ रनले हराएको थियो । राजस्थानको सञ्जु स्यामसन र पन्जाबको शिखर धवनले कप्तानी गर्नेछन् । पहिलो खेलमा जस बटलर, यशस्वी जैसवाल र सञ्जु स्यामसनले उत्कृष्ट अर्धशतक प्रहार गरेका थिए ।

बटलर र स्यामसन प्रमुख ब्याटिङ हतियार हुन् । यी दुबै ब्याटर आक्रामक ब्याटिङका लागि चिनिन्छन् । मध्यक्रममा शिम्रन हेटमायर, देवदत्त पाडिक्कल र रियान पराग हुनेछन् । हेटमायरको प्रदर्शन निकै महत्वपूर्ण हुनेछ । अलराउन्डर जेसन होल्डर र रविचन्द्रन आश्विन टोलीमा हुँदा ब्याटिङक्रम मजबुत छ ।

तीव्र गतिका बलरमा ट्रेन्ट बोल्ट र नवदीप सैनी हुनेछन् । युजभेन्द्र चहल प्रमुख बलिङ हतियार हुन् । हैदराबादलाई हराउन चहलले चार विकेट लिएका थिए । केएम आसिफको स्थानमा राजस्थानले आज सन्दीप शर्मा वा कुलदीप सेन मध्य एकलाई मौका दिनसक्छ । जेसन होल्डरको स्थानमा ओबेद म्याककोयलाई मैदान उतार्न सक्छ ।

पन्जाबका भानुका राजपक्षेले कोलकाताविरुद्ध ५० र शिखर धवनले ४० रन जोडेका थिए । यी दुई प्रमुख ब्याटर हुन् । तुलनात्मक रुपमा पन्जाबको ब्याटिङ कमजोर छ । स्टार टि२० विशेष ब्याटर टोलीमा छैनन् ।

जितेश शर्मा, सिकन्दर राजा, साम करण र शाहरुख खानले मध्यक्रम सम्हाल्नेछन् । राजा अनुभवी खेलाडी हुँदा मध्यक्रमको जिम्मेवारी अतिरिक्त हुनेछ । लियाम लिभिङस्टोन आजको खेलमा पनि उपलब्ध हुने सम्भावना कम छ । उनी पूर्ण रुपमा फिट भएका छैनन् ।

उता प्रमुख बलर कागिसो रबाडा टोलीमा आएका छन् । रबाडा टोलीमा आउँदा नाथन एलिसलाई बेन्चमा राख्न सक्छ । रबाडा योर्कर र गतिका लागि चिनिन्छन् । रबाडा प्रतिघण्टा १ सय ५० किलोमिटरको गतीमा बलिङ गर्ने गर्दछन् । उनको गति र योर्कर खेल्न राजस्थानका ब्याटरलाई सहज हुनेछैन ।

आक्रामक ब्याटर जस बटलर र कागिसो रबाडाबीचको ब्याटल हेर्न लायक हुनेछ । यस खेलममा यी दुई खेलाडीबीचको प्रतिस्पर्धाको रुपमा समेत हेरिएको छ । पन्जाबको तीव्र गतिको बलिङ आक्रामण भने मजबुत छ । रबाडा, अर्शदीप सिंह र साम करन तीव्र गतिका बलरको रुपमा छन् । स्पिनरमा राहुल चाहर र सिकन्दर राजा हुनेछन् ।

हेड टु हेड :

आइपिएलमा पन्जाब र राजस्थानबीच कुल २४ खेल भएका छन् । जसमा राजस्थान १४ र पन्जाब १० खेलमा विजयी भएका छन् । पछिल्ला पाँच खेलमा राजस्थान चार र पन्जाब एक खेलमा विजयी भएका छन् ।