एजेन्सी – ओपनर यशस्वी जैसवाल र जस बटलरको सानदार ब्याटिङको सहयोगमा राजस्थान रोयल्सले इन्डियन प्रिमियर लिग (आइपिएल) २०२३ को ११ औं खेलमा दिल्ली क्यापिटल्सलाई २ सय रनको विशाल लक्ष्य दिएको छ ।

गुवाहाटीमा टस हारेर पहिला ब्याटिङको निम्तो पाएको राजस्थानले निर्धारित २० ओभरमा ४ विकेट गुमाउँदै १ सय ९९ रन बनायो । राजस्थानका ओपनर जस बटलरले ५१ बलमा ११ चौका र १ छक्कासहित सर्वाधिक ७९ रनको योगदान दिए ।

अर्का बायाँ हाते युवा ओपनर यशस्वी जैसवाल ३१ बलमा ११ चौका र १ छक्कासहित ६० रनमा आउट भए । पहिलो विकेटका लागि जैसवाल र बटलरले ८.३ ओभरमा ९८ रनको उत्कृष्ट साझेदारी गरेका थिए । जैसवालले २५ र बटलरले ३२ बलमा अर्धशतक पूरा गरेका थिए ।

दुबै खेलाडी तीव्र गतिका बलर मुकेश कुमारको बलमा कट एण्ड बोल्ड आउट भएका थिए । कप्तान सञ्जु स्यामसन डक र रियान पराग ७ रनमा आउट भए । शिम्रन हेटमायर २१ बलमा १ चौका र ४ छक्कासहित ३९ र ध्रुव जुरेल ८ रनमा अविजित रहे । दिल्लीका मुकेश कुमारले ४ ओभरमा ३६ रन खर्चेर २ विकेट लिए । कुलदीप यादव र रोभम्यान पावेलले एक एक विकेट लिए ।

पहिलो खेलमा दिल्ली लखनऊ सुपर जायन्ट्ससँग ५० रन र दोस्रो खेलमा गुजरात टाइटन्ससँग ६ विकेटले पराजित भएको थियो । राजस्थानले पहिलो खेलमा सनराइजर्स हैदराबादलाई ७२ रनले हराएको थियो । पन्जाब किंग्ससँग ५ रनले पराजित भएको थियो ।