काठमाडौं (हाम्रो खेलकुद)– राष्ट्रिय क्रिकेट टोलीका सदस्य सन्दीप लामिछानेविरुद्ध नाबालिक बलात्कारको मुद्दामा काठमाडौं जिल्ला अदालतले दुई जनाको बक पत्र गराउन आदेश हो ।

जिल्ला अदालत काठमाडौंका न्यायाधीश शंकरराज बरालको इजलासले आइतबार पीडित किशोरीको मेडिकल गर्ने डाक्टर र अर्का एकजनाको बकपत्र गराउन आदेश दिएका हुन् । सुनुवाइ सुरु हुन लाग्दा पीडित पक्षका कानून व्यवसायीले बकपत्रको काम बाँकी रहेको र उनीहरुलाई झिकाउनुपर्ने माग गरेका थिए । त्यसपछि न्यायाधीशले उनीहरुको बकपत्र गर्न आदेश दिएको बताइएको छ ।

गत कात्तिक २९ गते न्यायाधीश माधवप्रसाद घिमिरेको एकल इजलासले नै सन्दीपलाई पुर्पक्षका लागि थुनामा पठाउने आदेश गरेको थियो । घिमिरेले गरेको आदेश उच्च अदालत पाटन र सर्वोच्च अदालतबाट बदर भएको थियो । उच्च अदालतले धरौटीमा छाड्न आदेश दिएपछि ९९ दिन सन्दीप थुनामुक्त भएका थिए ।

त्यसपछि नेपाल क्रिकेट संघ (क्यान) ले उनलाई राष्ट्रिय क्रिकेट टोलीमा समावेश गरेको थियो । त्यसयता राष्ट्रिय टोलीले खेलेका १२ मध्ये सन्दीपले ११ खेल खेलेका थिए । उच्च अदालतले उनलाई विदेश जानबाट भने रोक लगाएको थियो ।

पछि सर्वोच्च अदालतले सन्दीपलाई थुना बाहिर राख्ने आदेश नै सदर गर्दै विदेश जान लागेको प्रतिबन्ध पनि हटाउन आदेश दिएको थियो । सन्दीप वैशाख ५ गते देखि नेपालमा सुरु हुने एसिसी प्रिमियर कपको तयारीका लागि हाल राष्ट्रिय टोलीको प्रशिक्षणमा छन् ।