एजेन्सी – तीव्र गतिका बलर हरिस रौफको उत्कृष्ट बलिङको सहयोगमा पाकिस्तानले पहिलो टि२० आई खेलमा न्युजिल्यान्डलाई ८८ रनले हराएको छ । योसँगै घरेलु टोली पाकिस्तानल पाँच खेलको सिरिजमा १–० को अग्रता लिएकोछ ।

जितको लागि १ सय ८३ रनको विजयी लक्ष्य पछ्याएको न्युजिल्यान्ड १५.३ ओभरमा ९४ रनमा अल आउट भयो । न्युजिल्यान्डका मार्क च्यापम्यानले २७ बलमा ४ चौका र १ छक्कासहित सर्वाधिक ३४ रन बनाए । इन्डियन प्रिमियर लिगा र केहि खेलाडी घाइते हुँदा न्युजिल्यान्डले दोस्रो रोजाईको टोली पाकिस्तान पठाएको छ ।

ओपनर तथा कप्तान टम लाथम २०, चाद वोवेस १, विल योंग २, डर्याल मिचेल ११, जेम्श निसम १५ र रचिन रविन्द्र २ रनमा आउट भए ।

पाकिस्तानका तीव्र गतिका बलर हरिस रौफले ३.३ ओभरमा १७ रन खर्चेर ४ विकेट लिए । ईमाद वासिमले १ ओभरमा २ रन खर्चेर २ विकेट लिए । शाहिन शाह अफ्रिदी, जमान खान, फहिम अशरफ र शादब खानले समान एक विकेट लिए ।

त्यसअघि गद्धाफी स्टेडियम लाहोरमा टस जितेर पहिला ब्याटिङको निम्तो पाएको पाकिस्तान १९.५ ओभरमा १ सय ८२ रनमा अल आउट भएको थियो । पाकिस्तानका युवा ब्याटर सैम अयुबले २८ बलमा ६ चौका र २ छक्कासहित ४७ रनमा रन आउट भए । फखार जमानले ३४ बलमा ४ चौका र २ छक्कासहित ४७ रन बनाए ।

तीव्र गतिका बलर एडम मिल्नेले ओपनर मोहम्मद रिजवानलाई ८ र बाबर आजमलाई ९ रनमा आउट गरेका थिए । शादब खान ५, इफ्तिखर अहमद शून्य, इमान वासिम १६, फहिम अशरफ २२ र हरिफ रौफले ११ रन बनाए ।

न्युजिल्यान्डका तीव्र गतिका बलर म्याट हेनरीले ४ ओभरमा ३२ रन खर्चेर ३ विकेट लिए । म्याट हेनरीले १३ औं ओभरको पाँचौं बलमा शादब खान, छैटौं बलमा इफ्तिखर अहमद र १९ औं ओभरको पहिलो बलमा शाहिन शाह अफ्रिदीलाई आउट गर्दै ह्याट्रिक लिएका थिए ।

एडम मिल्नेले ४ ओभरमा ५१ रन खर्चेर २ विकेट लिए । बेन लिस्टरले दुई, जेम्श नसिम र ईश सोधीले समान एक विकेट लिए । दोस्रो खेल शनिबार र तेस्रो खेल सोमबार हुनेछ । चौथो खेल बिहीबार र अन्तिम खेल सोमबार हुनेछ ।