काठमाडौं (हाम्रो खेलकुद) – अनुभवी खेलाडी बाबर हायतको सानदार शतकमा हङकङले एसिसी प्रिमियर कपमा सिंगापुरलाई ८ विकेटले हराउँदै विजयी सुरुवात गरेको छ । माथिल्लो मुलपानी क्रिकेट मैदानमा भएको समूह बी को पहिलो खेलमा हङकङले महत्वपूर्ण दुई अंक जोडेको हो ।

जितको लागि १ सय ७५ रनको विजयी लक्ष्य पछ्याएको हङकङले ३३ ओभरमा २ विकेट गुमाउँदै पूरा गर्यो । हङकङको जितमा बाबर हायत ९४ बलमा १० चौका र ६ छक्कासहित १ सय ८ रनमा अविजित रहे । बाबरले ३३ औं ओभरमा अरित्र दत्तलाई तेस्रो, चौथो र पाँचौं बलमा लगातार छक्का हान्दै सहज जित दिलाएका थिए ।

बाबरले लगातार दुई छक्का साथ ९२ बलमा शतक पूरा गरे । बाबर प्रिमियर कपमा शतक हान्ने पहिलो खेलाडी बनेका छन् ।
कप्तान निजाकत खान ८९ बलमा ३ चौका र १ छक्कासहित ५१ रनमा आउट भए । दोस्रो विकेटका लागि बाबर र निजाकतले १ सय ३२ रनको सानदार शतकीय साझेदारी गरेका थिए । ओपनर अंशुमन रथ ६ रनमा आउट भए । सिंगापुरका रमेश र अरित्र दत्तले एक एक विकेट लिए ।

त्यसअघि माथिल्लो मुलपानी क्रिकेट मैदानमा टस हारेर पहिला ब्याटिङको निम्तो पाएको सिंगापुर ४२.१ ओभरमा १ सय ७४ रनमा अल आउट भएको थियो । सिंगापुरका ओपनर तथा कप्तान अरित्र दत्तले ५७ बलमा ९ चौकासहित सर्वाधिक सर्वाधिक ४९ रन बनाए ।

अन्य कुनैपनि सिंगापुरे ब्याटरले राम्रो प्रदर्शन गर्न सकेनन् । सुरेन्द्रन चन्द्रमोहन १०, अवि दिक्षीत १२, अर्यान मोदीले २० र रमेश कलिमुथुले १८ रन बनाए । हङकङका स्पिनर एहसान खानले १० ओभरमा ३ मेडनसहित २४ रन खर्चेर सर्वाधिक ४ विकेट लिए । अर्का स्पिनर यासिम मुर्तजाले १० ओभरमा १ मेडनसहित २५ रन खर्चेर ३ विकेट लिए । आयुश शुक्ला, अजिज खान र मोहम्मद गजानफरले समान एक विकेट लिए ।

समूह बी मा युएई, हङकङ, कुवेत, सिंगापुर र बहराइन छन् । समूह ए मा ओमान, नेपाल, कतार, मलेसिया र साउद अरेविया छन् । बुधबार टियु मैदानमा युएई र कुवेतबीच प्रतिस्पर्धा हुनेछ । मुलपानीमा ओमान र कतार भिड्नेछन् । प्रतियोगिता शीर्ष दुई टोली सेमिफाइनलमा पुग्नेछन् । फाइनल हुँदै उपाधि जित्ने टोलीले एसिया कपमा भारत र पाकिस्तानसँग खेल्नेछन् ।