काठमाडौं (हाम्रो खेलकुद) – नेपालका युवा अलराउन्डर कुशल मल्ल एसिसी प्रिमियर कपमा मलेसियाविरुद्ध प्लेयर अफ द म्याच चुनिएका छन् । नेपाललाई ६ विकेटको सानदार जित दिलाउन उत्कृष्ट ब्याटिङ गरेका कुशल मल्ल खेलको प्लेयर अफ द म्याच चुनिएका हुन् ।

जितको लागि २ सय ३६ रनको विजयी लक्ष्य पछ्याएको नेपालले ३६.२ ओभरमा ४ विकेट गुमाउँदै पूरा गर्यो । नेपालको जितमा कुशल मल्ल ४० बलमा ५ चौका र ५ छक्कासहित ७० रनमा नटआउट रहे ।

आक्रामक ब्याटिङ गर्दै कुशलले २८ बलमा अर्धशतक पूरा गरेका थिए । चौथो विकेटका लागि कुशल मल्लले भीम सार्कीसँग १ सय १२ रनको सानदार शतकीय साझेदारीका साथ सहज जितको आधार तय गरेका थिए ।

त्यसअघि टियु क्रिकेट मैदानमा टस जितेर पहिला ब्याटिङ रोजेको मलेसियाले निर्धारित ५० ओभरमा ९ विकेट गुमाउँदै २ सय ३५ रन बनाएको थियो । समूह बी मा युएई, हङकङ, कुवेत, सिंगापुर र बहराइन छन् । समूह ए मा ओमान, नेपाल, कतार, मलेसिया र साउद अरेविया छन् । बुधबार टियु मैदानमा युएई र कुवेतबीच प्रतिस्पर्धा हुनेछ ।

प्रतियोगितामा हरेक समूहका शीर्ष दुई टोली सेमिफाइनलमा पुग्नेछन् । फाइनल हुँदै उपाधि जित्ने टोलीले एसिया कपमा भारत र पाकिस्तानसँग खेल्नेछन् । नेपालले अव शुक्रबार ओमानसँग खेल्नेछ ।

उक्त खेल नेपालको ५० औं ओडिआई खेल हुनेछ । माथिल्लो मुलपानी मैदानमा भएको अर्को खेलमा खेलमा हङकङले सिंगापुरलाई ८ विकेटले हरायो । हङकङको जितमा बाबर हायत ९४ बलमा १० चौका र ६ छक्कासहित १ सय ८ रनमा अविजित रहे ।