काठमाडौं (हाम्रो खेलकुद) – माथिल्लो मुलपानी क्रिकेट मैदान अन्तर्राष्ट्रिय क्रिकेट खेल आयोजना गर्ने नेपालको सातौं मैदान बनेको छ । मंगलबार एसिसी प्रिमियर कपमा हङकङ र सिंगापुरसँग खेलबाट माथिल्लो मुलपानी क्रिकेट मैदानमा पहिलो पटक अन्तर्राष्ट्रिय खेल भएको हो ।

अन्तर्राष्ट्रिय क्रिकेट प्रतियोगिता आयोजना गरेको यो नेपालको सातौं मैदान हो । यसअघि नेपालले उमेर समूह र सिनियरको अन्तर्राष्ट्रिय गरि कुल ६ मैदानमा विभिन्न अन्तर्राष्ट्रिय प्रतियोगिता आयोजना गरेको थियो ।

नेपालमा यसअघि कीर्तिपुरस्थित त्रिभुवन विश्वविद्यालयको क्रिकेट मैदानसँगै ललितपुरको पुल्चोकस्थित इन्जिनियरिङ क्याम्पस मैदान, ललितपुरकै जावलाखेलस्थित सेन्ट जेभियर्स स्कुलको मैदान, काठमाडौंको मुटुमा अवस्थित टुँडिखेल, भक्तपुर जिल्लाको सैनिक आवसीय महाविद्यालयको मैदान र कास्कीको पोखरास्थित क्रिकेट मैदानमा अन्तर्राष्ट्रिय प्रतियोगिता आयोजना गरेको थियो ।

टियु नेपालको एकमात्रै पूर्ण अन्तर्राष्ट्रिय मान्यता प्राप्त क्रिकेट मैदान हो । टियु ओडिआई मान्यता प्राप्त मैदान पनि हो । अन्य मैदान भने हाल अन्तर्राष्ट्रिय प्रतियोगिता आयोजना गर्न योग्य छैनन् । पछिल्लो डेढ दशक यता टियुमा लगभग सबै अन्तर्राष्ट्रिय प्रतियोगिता हुँदै आएका छन् ।

नेपालले पहिलो पटक अन्तर्राष्ट्रिय प्रतियोगिता रुपमा सन् १९९८ मा एसिसी ट्रफी आयोजना गरेको थियो । उक्त एसिसी ट्रफी टियु, पुल्चोक र जावलाखेलमा गरि तीन मैदानमा आयोजना भएको थियो । २००५ मा नेपालले एसिसी यू–१९ कप प्रतियोगिता विरेन्द्र सैनिक आवासिय महाविद्यालय भक्तपुर, पुल्चोक, टियु र टुँडिखेल गरि चार मैदानमा सम्पन्न भएको थियो ।

उक्त प्रतियोगिता फाइनलमा नेपालले मलेसियालाई ७ विकेटले हराउँदै २००६ मा श्रीलंकामा भएको यू१९ विश्वकप खेलेको थियो । २०१९ मा १३ औं दक्षिण एसियाली खेलकुद (साग) अन्तर्गत महिला क्रिकेट पोखरा क्रिकेट मैदानमा भएको थियो ।

क्यानका पूर्वअध्यक्ष विनयराज पाण्डेले माथिल्लो मुलपानी क्रिकेट मैदानको उद्धघाटन गरेका थिए । २००८ मा क्यानले माथिल्लो मुलपानी मैदानलाई एकेडेमीको शैलीमा निर्माण गरेको थियो । तर पछि उक्त मैदानलाई क्यानले घरेलु प्रतियोगिता आयोजना गर्दै आएको छ ।

नेपालको एकमात्रै राष्ट्रिय प्रधानमन्त्री कप एकदिवसीय प्रतियोगिता पछिल्लो समय लगातार माथिल्लो मुलपानीमा हुँदै आएका छन् । २०१९ को १३ औं दक्षिण एसियाली खेलकुद सागमा माल्दिभ्स र २०२० को आइसिसी विश्वकप लग–२ अघि अमेरिकाले नेपालसँग उक्त मैदानमा अभ्यास खेल खेलेका थिए ।

माथिल्लो मुलपानी क्रिकेट मैदानमा एसिसी प्रिमियर कपमा एक सेमिफाइनलसहित कुल ११ खेल हुनेछन् । पहिलो खेलमा हङकङले सिंगापुरलाई ८ विकेटले हराउँदै सुरुवात गरेको छ । नेपालले माथिल्लो मुलपानीमा एकखेल खेल्ने तालिका छ । नेपालले उक्त मैदानमा वैशाख ११ (अप्रिल २४) मा साउदी अरेवियासँग खेल्नेछ ।

सुरक्षाको कारण नेपालका अन्य सबै खेल भने टियुमा राखिएको छ । मुलपानीमा क्यानले दर्शकको लागि प्रवेश निशुल्क गरेको छ । तल्लो मुलपानी रंगशाला भने राष्ट्रिय खेलकुद परिषद् (राखेप) को स्वामित्वमा छ । उक्त मैदान आफूहरुलाई हस्तान्तरण गर्न क्यानले राखेपलाई आग्रह गर्दै आएको छ ।