एजेन्सी – युएईका युवा ब्याटर वृत्य अरविन्दपछि अनुभवी अलराउन्डर रोहन मुस्तफाले पनि एसिसी प्रिमियर कपमा कुवेतविरुद्ध शतक हानेका छन् । टियु क्रिकेट मैदानमा टस हारेर पहिला ब्याटिङको निम्तो पाएको युएईले ४५ ओभरमा ३ विकेट गुमाउँदै २ सय ७६ रन बनाएको छ ।

युएईका रोहन मुस्तफा १ सय १९ बलमा १० चौका र २ छक्कासहित १ सय ५ रनमा क्रिजमा छन् । १६ बलमा खाता खोलेका मुस्तफाले ९५ बलमा अर्धशतक पूरा गरेका थिए । तर बाँकी २३ बलमा अर्धशतक पूरा गर्दै शतक पूरा गरेका हुन् । वृत्य अरविन्द १ सय ४२ बलमा १० चौका र ७ छक्कासहित १ सय ४२ रनमा क्रिजमा छन् ।

एक समय २४–३ को खराब सुरुवात गरेको युएईलाई चौथो विकेटका लागि मुस्तफा र वृत्यले २ सय ५२ रनको सानदार दोहोरो शतकीय साझेदारी गरेका छन् । युएईकोे सुरुवात भने सम्झन लायक थिएन । कप्तान मोहम्मद वासिम पहिलो ओभरको चौथो बलमै ८ रनमा क्याच आउट भएका थिए ।

तीव्र गतिका बलर शाहरुख कुद्दुसको बलमा वासिम फस्ट स्लिपमा मिट भावसारबाट क्याच आउट भए । उनले ४ बलमा २ चौका प्रहार गरे ।

स्पिनर यासिन पटेलले दोस्रो ओभरको दोस्रो बलमा अर्का ओपनर आर्यन लाक्रालाई शून्यमा बोल्ड आउट गरे । शाहरुखले पाँचौं ओभरको चौथो बलमा अनुभवी ब्याटर रमिज शाहजादलाई ९ रनमा क्याच गराए । शाहजाद मोहम्मद अमिनबाट मिड अनमा क्याच आउट भएका थिए ।