काठमाडौं (हाम्रो खेलकुद) – एसीसी प्रिमियर कप अन्तर्गत शुक्रबार टियु क्रिकेट मैदानमा नेपाल र ओमनाबीच हुने समूह ए को खेलले अन्तत: एकदिवसीय अन्तर्राष्ट्रिय (ओडियआई) मान्यता पाएको छ । यससँगै टियु मैदानमा विहान ९ बजे सुरु हुने खेल नेपालको ५० औं ओडियआई खेल हुने भएको हो ।

नेपाल र ओमान दुवै ओडिआई मान्यता प्राप्त टोली भएपनि खेल सुरु हुने अघिल्लो दिनसम्म ओडिआई खेल हो वा होईन भन्ने अनिश्चितता रहेको थियो । नेपाल क्रिकेट संघ (क्यान) ले अन्तर्राष्ट्रिय क्रिकेट परिषद् (आइसिसी) लाई ओडिआई मान्यता दिन पत्र पठाइसकेको अवस्थामा विहीबार मध्यरातमा मात्र स्वीकृति प्राप्त भएको हो ।

प्रतियोगिताका अन्य खेलको मान्यता भने सामान्य ‘५०-अ‍ोभर खेल’ मात्र रहँदै आएको छ । एसीसीले आयोजना गर्ने प्रतियोगिता भएकाले अन्य खेलले लिस्ट ए मान्यता पनि पाएका छैनन् । तर क्यानले दुवै ओडिआई राष्ट्र भएको र टियु मैदानले पटक पटक ओडिआई आयोजना गरेकाले मान्यता पाउन पत्र लेखेको थियो । आइसीसीले यस खेललाई सदर गर्दै अन्तत: ओडिआई मान्यता दिएको छ ।

यसअघि सन् २०१८ मा मलेसियामा भएको एसिया कप छनोटमा नेपाल र युएईबीचको खेलले ओडिआई मान्यता पाएको थियो । उक्त खेलमा नेपालका सागर पुनले ओडिआई खेलमा डेब्यू गरेका थिए ।

नेपालले हालसम्म ७ देशसँग ४९ ओडिआई खेल खेलेको छ । सन् २०१८ मार्च १५ मा ओडिआई मान्यता प्राप्त गरेको नेपालले हालसम्म ४९ ओडिआईमा २६ मा जित, २१ मा हार, एक मा टाई तथा एक खेलमा नतिजा बिहीन छ । नेपालले कुल ७ देशसँग ओडिआई खेलेको छ ।

४९ मध्य नेपालले आइसिसी विश्वकप लिग–२ मा ३६ खेल खेलेको थियो । बाँकी १२ खेल सिरिजको रुपमा र एक खेल प्रतियोगितामा खेलेको थियो । नेपालले ओडिआईमा सर्वाधिक धेरै खेल युएईसँग १३ र सबैभन्दा कम नेदरल्यान्ड्ससँग २ खेल खेलेको छ ।

नेपालले युएईसँग १३, पपुवा न्युगिनीसँग १०, ओमान, नामिबिया, स्कटल्यान्ड र अमेरिकासँग समान ६ ओडिआई खेल खेलेको छ । नेदरल्यान्ड्ससँग दुई ओडिआई खेल खेलेको छ ।