काठमाडौं (हाम्रो खेलकुद) – बायाँ हाते युवा ब्याटर कुशल मल्ल नेपालबाट अन्तर्राष्ट्रिय एकै खेलमा सर्वाधिक छक्का हान्ने खेलाडी बनेका छन् । कुशलले एसिसी प्रिमियर कपमा ओमानविरुद्ध ६४ बलमा ९ चौका र १० छक्कासहित १ सय ८ रनको विष्फोटक शतकीय इनिङ खेले ।

उनले उक्त खेलमा १० छक्का हानेका थिए । कुनैपनि अन्तर्राष्ट्रिय खेलमा नेपाली ब्याटरले हानेको सर्वाधिक धेरै छक्का हो । यसअघि नेपालबाट अन्तर्राष्ट्रिय क्रिकेटमा पारस खड्का र ज्ञानेन्द्र मल्लले एकै खेलमा समान ९ छक्का प्रहार गरेका थिए । ज्ञानेन्द्रले २०१९ को १३ औं दक्षिण एसियाली खेलकुद (साग) मा भुटानविरुद्ध टि२० आईमा ५५ बलमा ५ चौका र ९ छक्कासहित १ सय ७ रनको शतकीय इनिङ खेलेका थिए ।

त्यस्तै पारस खड्काले सिंगापुरविरुद्ध टि२० आईमा २०१९ मा ५२ बलमा ७ चौका र ९ छक्कासहित १ सय ६ रन बनाएका थिए । २०२१ मा करण केसीले टि२० आईमा मलेसियाविरुद्ध १३ बलमा ७ छक्कासहित ४५ रन बनाएका थिए । दीपेन्द्रले मलेसियाविरुद्धदै ७ छक्का हान्दै १ सय १० रन बनाएका थिए ।

ओडिआईमा यसअघि एकै खेलमा नेपाली ब्याटरले ४–४ छक्का प्रहार गरेका थिए । ओडिआईमा एकै खेलमा नेपालबाट यसअघि रोहित पौडेल, कुशल भुर्तेल र कुशल मल्लले समान ४ छक्का हानेका थिए ।

ओडिआईमा एकै खेलमा सर्वाधिक छक्का हान्ने कीर्तिमान इंग्ल्यान्डका ओईन मोर्गनको नाममा छ । मोर्गनले २०१९ को एकदिवसीय विश्वकपमा अफगानिस्तानविरुद्ध १७ छक्का हानेका थिए । त्यसपछि रोहित शर्मा, एवि डिभिलियर्स र जसकरण मलहोल्त्राले समान १६ छक्का हानेका थिए ।