काठमाडौं (हाम्रो खेलकुद) – नेपालसँग खेल्नुअघि साउदीका ओपनर अब्दुल वहिदले एसिसी प्रिमियर कपमा कतारविरुद्ध सानदार शतक हानेका छन् । अब्दुलले ९८ बलमा १६ चौका र १ छक्कासहित शतक हानेका छन् । उनले सानदुन विथानागेलाई फाइन लेगमा चौका प्रहार गर्दै आफ्नो करिअरको पहिलो शतक हाने ।

उनको शतकको सहयोगमा जितको लागि २ सय १७ रनको मध्यम विजयी लक्ष्य पछ्याएको साउदीले ३१ ओभरमा २ विकेट गुमाउँदै १ सय ९८ रन बनाएको छ ।

अब्दुल १ सय १ बलमा १८ चौका र १ छक्कासहित १ सय १० रनमा क्रिजमा छन् । पहिलो खेलमा साउदी मलेसियासँग ८ विकेटले पराजित भएको थियो । साउदीले सोमबार माथिल्लो मुलपानी क्रिकेट मैदानमा नेपालसँग खेल्नेछ ।

त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको कतार ४९.५ ओभरमा २ सय १६ रनमा अल आउट भएको थियो । कतारका मोहम्मद तनविरले ४८ बलमा ७ चौकासहित सर्वाधिक ४६ रन बनाएका थिए ।

समूह ए मा नेपाल, ओमान, कतार, मलेसिया र साउदी छन् । समूह बी मा हङकङ, युएई, कुवेत, बहराइन र सिंगापुर छन् । हरेक समूहबाट शीर्ष दुई टोलीले सेमिफाइनलमा स्थान बनाउनेछन् । फाइनल हुँदै विजेता टोलीले एसिया कपमा भारत र पाकिस्तानसँग खेल्न पाउनेछ।