काठमाडौं (हाम्रो खेलकुद) – कुवेतले एसिसी प्रिमियर कपमा बहराइनमाथि दुई विकेटको रोमान्चक जित हात पारेको छ । जितको लागि २ सय ५६ रनको बलियो विजयी लक्ष्य पछ्याएको कुवेतले ४४.२ ओभरमा ८ विकेट गुमाउँदै पूरा गर्यो ।

कुवेतको जितमा युवा खेलाडी यासिन पटेल ८९ बलमा २ चौका र १ छक्कासहित ६३ रनमा अविजित रहे । सैयद मोनिब ५ रनमा अविजित रहे । युवाका युवा खेलाडी मिट भावसारले ५९ बलमा ५ चौकासहित ५४ रनमा आउट भए ।

अदनान इद्रिसले ४६ बलमा ११ चौकासहित ५६, उस्मान पटेल १८, राजिवा सानदुरुवन ८ र मोहम्मद अस्लामले १४ रन बनाए । बहराइनका अब्दुल मजिदले ९ ओभरमा १ मेडनसहित ५१ रन खर्चेर ३ विकेट लिए । अली डावुड, रिजवान बट, इमरान अनवार र सोहिल अहमदले एक एक विकेट लिए ।

त्यसअघि मुलपानी क्रिकेट मैदानमा टस हारेर पहिला ब्याटिङको निम्तो पाएको बहराइनले निर्धारित ५० ओभरमा ७ विकेट गुमाउँदै २ सय ५५ रन बनाएको थियो । बहराइनका तल्लोक्रमका इमरान अनवारले १९ बलमा ३ चौका र ५ छक्कासहित सर्वाधिक ५३ रनको योगदान दिएका थिए ।

फैज अहमद ५४ बलमा ४ चौका र २ छक्कासहित ४८ रनमा आउट भए । कप्तान हैदर अली ३४, जुनैद अजिज ३६ र सोहिल अहमद ३४ रनमा आउट भए । रिजवान बट ७ बलमा १ चौका र २ छक्कासहित १९ रनमा आउट भए ।

कुवेतका सैयद मोनिबले १० ओभरमा १ मेडनसहित ६९ रन खर्चेर सर्वाधिक ४ विकेट लिए । शाहरुख क्वुदुसले दुई विकेट लिए ।

समूह ए मा नेपाल, ओमान, कतार, मलेसिया र साउदी छन् । समूह बी मा हङकङ, युएई, कुवेत, बहराइन र सिंगापुर छन् । कुवेत पहिलो खेलमा युएईसँग १ सय ४३ रनले पराजित भएको थियो । कुवेतले अव मंगलबार सिंगापुर र बिहीबार हङकङसँग खेल्नेछ ।

उता बहराइनले पहिलो खेलमा सिंगापुरलाई १ सय ३२ रनले हराएको थियो । बहराइनले अव सोमबार हङकङ र बुधबार युएईसँग खेल्नेछ । हरेक समूहबाट शीर्ष दुई टोलीले सेमिफाइनलमा स्थान बनाउनेछन् । फाइनल हुँदै विजेता टोलीले एसिया कपमा भारत र पाकिस्तानसँग खेल्न पाउनेछ।