काठमाडौं (हाम्रो खेलकुद) – एसिसी प्रिमियर कपमा घरेलु टोली नेपालसँग वर्षाको कारण खेल रद्द भएपछि एक एक अंक बाँड्दा साउदी अरेबियालाई फाइदै फाइदा पुगेकोछ । सोमबार लगातार वर्षाको कारण माथिल्लो मुलपानी मैदानमा नेपालसँगको खेल हुन नसकेपछि साउदीको सेमिफाइनल खेल्ने सम्भावना मजबुत बनेको छ।

साउदी ३ खेलमा १ मा जित र १ मा हारसहित ३ अंकका साथ तेस्रो स्थानमा छ । साउदी पहिलो खेलमा मलेसियासँग ८ विकेटले पराजित हुँदा कतारलाई ७ विकेटले हराएको थियो । साउदी आजको खेलमा नेपालसँग पराजित भएको भए सेमिफाइनल खेल्ने सम्भावना निकै कठिन बन्ने थियो । तर नेपालसँग अंक बाँडेपछि सेमिफाइनल खेल्ने सम्भावना मजबुत बनेको छ ।

साउदीले अन्तिम खेलमा बुधबार ओमानसँग खेल्नेछ । यदि उक्त खेलमा साउदी विजयी भएमा सेमिफाइनलमा पुग्नेछ । पराजित भएमा वा अंक बाँडेमा भने ओमान सेमिफाइनलमा पुग्नेछ । ओमान ३ खेलमा २ मा जित र १ मा हारसहित ४ अंकका साथ दोस्रो स्थानमा छ । साउदी र ओमानबीचको खेल क्वाटरफाइनल सरह हुने भएको छ।

यदि साउदी आजको खेलमा पराजित भएको भए अन्तिम खेलमा विजयी हुँदैमा सेमिफाइनलमा पुग्न सक्दैन थियो । मलेसिया र कतारको नतिजासँगै ओमानको नेटरनरेटमा पनि भर पर्नुपर्ने हुन्थ्यो । तर अंक बाँडेपछि अन्तिम खेलमा जित निकाल्न सके सेमिफाइनलमा यात्रा पुग्ने पर्याप्त बनेको हो ।

पहिलो पटक एसिया कप क्वालिफायर खेलेको साउदी नेपालमा उपाधि जित्न नेपाल आएको बताएको छ । कतारलाई ७ विकेटले हराएपछि साउदीका कप्तान हिशाम शेखले आफ्नो टोलीको लक्ष्य उपाधि जित्नेसहित नेपाल आएको बताएका थिए । नेपालसँग अंक बाँडेपछि त्यो सम्भावना कायमै रहेको छ ।

समूह ए मा नेपाल ३ खेलमा ५ अंकका साथ सेमिफाइनलमा पुग्ने पहिलो टोली बनेको छ । कतार र मलेसिया सेमिफाइनल दौडबाट बाहिरिएका छन् । उता समूह बी मा हङकङ ३ खेलमा ५ अंकका साथ सेमिफाइनल नजिक छ । समूह बी मा हङकङ शीर्ष स्थानमा छ । हङकङले अन्तिम खेल बिहीबार कुवेतसँग खेल्नेछ ।

युएई ३ खेलमा २ मा जित र १ खेलमा हारका साथ ४ अंक जोड्दै दोस्रो स्थानमा छ । युएईले अन्तिम खेल बहराइनसँग बुधबार खेल्नेछ । सेमिफाइनलमा स्थान बनाउन युएईले उक्त खेल जित्नैपर्ने हुन्छ । बहराइन ३ खेलमा १ मा जित र १ मा हारसहित ३ अंकका साथ तेस्रो स्थानमा छ ।

कुवेत २ खेलमा १ मा जित र १ मा हारसहित २ अंकका साथ चौथो स्थानमा छ । कुवेत सेमिफाइनलमा पुग्न मंगलबार सिंगापुर र बिहीबार हङकङ दुबैलाई हराउनु पर्ने हुन्छ । सिंगापुर भने सुरुवाती तीन खेलमा पराजितका साथ प्रतियोगिताबाट बाहिरिएको छ ।

पहिलो सेमिफाइनलमा समूह ए को विजेता र समूह बी को उपविजेता खेल्नेछन् । दोस्रो सेमिफाइनल खेलमा समूह बी को विजेता र समूह ए को उपविजेताबीच प्रतिस्पर्धा हुनेछ । सेमिफाइनल, फाइनल हुँदै उपाधि जित्ने टोलीले आगमी सेप्टेम्बरमा पाकिस्तानमा हुने एसिया कप खेल्न पाउँछन् ।

एसिया कपमा भारत र पाकिस्तानसँग खेल्न पाउनेछ । त्यस्तै शीर्ष तीन टोलीले एसिसी इमर्जिङ टिम्स एसिया कप खेल्न पाउनेछन् ।