एजेन्सी – युवा खेलाडी मार्क च्यापम्यानको शतकमा न्युजिल्यान्डले पाँचौं तथा अन्तिम टि२० आई खेलमा घरेलु टोली पाकिस्तानमाथि ६ विकेटको सानदार जित हात पारेको छ । यो जितसँगै पाँच टि२० आई खेलको सिरिज न्युजिल्यान्डले २–२ को बराबरीमा सकेको छ।

जितको लागि १ सय ९४ रनको विशाल लक्ष्य पछ्याएको न्युजिल्यान्डले १९.२ ओभरमा ४ विकेट गुमाउँदै पूरा गर्यो । न्युजिल्यान्डको जितमा मार्क च्यापम्यानले ५७ बलमा ११ चौका र ४ छक्कासहित १ सय ४ रनको सानदार अविजित इनिङ खेले । उनले ५४ बलमा आफ्नो पहिलो टि२० आई शतक पूरा गरेका थिए । जेम्श निसम २५ बलमा ४ चौका र २ छक्कासहित ४५ रनमा अविजित रहे ।

एक समय ७४–३ को अवस्थामा पुगेको न्युजिल्यान्डलाई पाँचौं विकेटका लागि जेम्श निसम र मार्क च्यापम्यानले १ सय २१ रनको सानदार अविजित शतकीय साझेदारीका साथ जित पक्का गराएका थिए । ओपनर टम लाथम डक, चाद बोवेस १९, विल योंग ४ र डर्याल मिचेल १५ रनमा आउट भए । पाकिस्तानका शाहिन शाह अफ्रिदीले ४ ओभरमा ४८ रन खर्चेर २ विकेट लिए । इमाद वासिमले ४ ओभरमा २१ रन खर्चेर २ विकेट लिए ।

त्यसअघि रावलपिंडी क्रिकेट स्टेडियममा टस हारेर पहिला ब्याटिङको निम्तो पाएको पाकिस्तानले निर्धारित २० ओभरमा ५ विकेट गुमाउँदै १ सय ९३ रन बनायो । पाकिस्तानका ओपनर मोहम्मद रिजवानले ६२ बलमा ७ चौका र ४ छक्कासहित ९८ रनमा नटआउट रहे । इफ्तिखर अहमद २२ बलमा ३ चौका र २ छक्कासहित ३६ रनमा आउट भए ।

इमाद वासिम १४ बलमा ५ चौका र १ छक्कासहित ३१, कप्तान बाबर आजम १९, मोहम्मद हरिस र सैम अयुब डक आउट भए । न्युजिल्यान्डका ब्लेयर टिकनेरले ४ ओभरमा ३३ रन खर्चेर सर्वाधिक ३ विकेट लिए । ईश सोधीले ४ ओभरमा २१ रन खर्चेर १ विकेट लिए । पाकिस्तान सुरुवाती दुई खेलमा ८८ रन र ३८ रनले पराजित भएको थियो ।

तेस्रो खेलमा न्युजिल्यान्ड विजयी हुँदा चौथो खेल रद्द भएको थियो । च्यापम्याननै प्लेयर अफ द सिरिज चुनिए । अव पाकिस्तान र न्युजिल्यान्डबीच पाँच ओडिआई खेलको सिरिज हुनेछ । पहिलो खेल बिहीबार हुनेछ ।