काठमाडौं (हाम्रो खेलकुद) – एसिसी प्रिमियर कपमा समूह चरणका अन्तिम चार मध्य तीन खेल अनौपचारिक क्वाटरफाइनल हुने भएका छन् । बुधबार टियु क्रिकेट मैदानमा साउदी अरेविया र ओमानबीच प्रतिस्पर्धा हुनेछ ।

मुलपानीमा युएई र बहराइनबीच प्रतिस्पर्धा हुनेछ । यी दुई खेलको विजेता टोली सेमिफाइनलमा पुग्नेछन् । बिहीबार टियुमा नेपाल र कतारबीच प्रतिस्पर्धा हुनेछ । यो खेलले नेपाल समूह विजेता हुने वा उपविजेता हुने निर्धारण गर्नेछ । सोहि दिन मुलपानीमा हङकङ र कुवेतबीच प्रतिस्पर्धा हुनेछ ।

विजेता टोलीले सेमिफाइनलमा स्थान बनाउनेछन् । नेपाल र कतार बाहेकका अन्य तीन खेल क्वाटरफाइनल सरह हुनेछन् । विजेता टोली सेमिफाइनलमा र पराजित हुने टोली बाहिरिने समिकरण छ । १० टोली सहभागी प्रतियोगितामा हरेक समूहमा पाँच पाँच टोली छन् ।

समूह चरणका १६ खेल सकिँदा सेमिफाइनलमा स्थान बनाउने घरेलु टोली नेपाल एक्लो टोली हो । प्रतियोगिता सेमिफाइनल दौडबाट समूह ए बाट मलेसिया, कतार र समूह बी बाट सिंगापुर बाहिरएका छन् ।

ओमान ३ खेलमा २ मा जित र १ मा हारसहित ४ अंकका साथ तेस्रो स्थानमा छ । साउदी ३ खेलमा १ मा जित, १ मा हार र १ खेलमा अंक बाँड्दै चौथो स्थानमा छ । ओमान विजयी हुँदा ६ अंकका साथ सेमिफाइनलमा पुग्नेछ । साउद विजयी हुँदा ५ अंकका साथ सेमिफाइनलमा पुग्नेछ ।

त्यस्तै यो खेल साउदी र ओमानलाई क्वाटरफाइनल हुनेछ । समूह ए मा नेपाल ३ खेलमा ५ अंकका साथ शीर्ष स्थानमा रहेर सेमिफाइनलमा पुगेको छ । मलेसिया ४ खेलमा २ मा जित र २ मा हारका साथ ४ अंक जोड्दै दोस्रो स्थानमा रहेर बाहिरिएको छ । कतार तीनै खेलमा पराजित हुँदै बाहिरिएको छ ।

समूह बी मा हङकङ ३ खेलमा ५ अंकका साथ शीर्ष स्थानमा छ । हङकङले अन्तिम खेल बिहीबार कुवेतसँग खेल्नेछ । कुवेत ३ खेलमा २ मा जित र १ मा हारसहित ४ अंकका साथ चौथो स्थानमा छ । हङकङ र कुवेतबीचको खेल क्वाटरफाइनल नै हुनेछ । विजेता टोली सेमिफाइनलमा पुग्नेछ ।

हङकङ विजयी हुँदा ७ अंक हुने हुँदा समूह विजेता बन्नेछ । वर्षाले खेल रोकिँदा पनि हङकङ सेमिफाइनलमा पुग्नेछ । तर हङकङ पराजित भएमा भने उता युएई बहराइनसँग पराजित हुनुपर्छ ।

यदि युएई पराजित भएमा बाहिरिनेछ । बहराइन विजयी हुँदा ५ अंक हुनेछ । हङकङ र बहराइनको समान ५ अंक हुँदा नेटरनरेटका कारण हङकङ सेमिफाइनलमा पुग्न सक्छ । तर बहराइनको जितको अन्तर निकै सानो हुनुपर्छ ।

उता युएई ३ खेलमा २ मा जित र १ मा हारसहित ४ अंकका साथ दोस्रो स्थानमा छ । बहराइन ३ खेलमा १ मा जित र १ मा हारसहित ३ अंकका साथ चौथो स्थानमा छ । बहराइन र युएईबीच बुधबार मुलपानीमा प्रतिस्पर्धा हुनेछ । युएई विजयी हुँदा ६ अंकका साथ सेमिफाइनलमा पुग्नेछ । पराजित हुँदा भने युएई बाहिरिनेछ ।

बहराइन अन्तिम खेलमा विजयी भएर मात्रै हुँदैन । हङकङले कुवेतसँग फराकिलो अन्तरले हार्नुपर्छ । बहाइनको जितको अन्तर फराकिलो हुनुपर्छ ।

प्रतियोगिता पहिलो सेमिफाइनल खेलमा समूह ए को विजेताले समूह बी को उपविजेतासँग खेल्नेछ । दोस्रो सेमिफाइनल खेलमा समूह बी को विजेताले समूह ए को उपविजेतासँग खेल्नेछ । सेमिफाइनल शनिबार हुनेछ । फाइनल सोमबार हुनेछ । प्रतियोगिता विजेता टोलीले एसिया कपमा भारत र पाकिस्तासँग खेल्न पाउनेछ ।

शीर्ष तीन टोलीले एसिसी इमर्जिङ टिम्स एसिया कप खेल्न पाउनेछन् । इमर्जिङ टिप्समा एसियाका टेस्ट टोलीका यू-२३ टोलीको सहभागिता रहनेछ । एसिया कप सेप्टेम्बरमा पाकिस्तान र इमर्जिङ टिम्स एसिया कप जुलाईमा हुनेछ।