एजेन्सी – दुई स्पिनर राशिद खान र नुर अहमदको उत्कृष्ट बलिङमा गुजरात जायन्ट्सले इन्डियन प्रिमियर लिग (आइपिएल) २०२३ को ३५ औं खेलमा मुम्बई इन्डियन्सलाई ५५ रनले पराजित गरेको छ । पाँचौं जितका साथ गुजरात अंक तालिकामा दोस्रो स्थानमा उक्लिएको छ ।

जितको लागि २ सय ८ रनको विशाल विजयी लक्ष्य पछ्याएको मुम्बईले निर्धारित २० ओभरमा ९ विकेट गुमाउँदै १ सय ५२ रन मात्रै बनाउन सक्यो । मुम्बईको लागि युवा ब्याटर नेहाल वढेराले २१ बलमा ३ चौका र ३ छक्कासहित सर्वाधक ४० रनको योगदान दिए । तर प्रमुख ब्याटरले खराब प्रदर्शन गरेपछि त्यो जितको लागि पर्याप्त भने थिएन ।

कप्तान हार्दिक पान्ड्याको दोस्रो ओभरको अन्तिम बलमा रोहित शर्मा ८ बल खेल्दै दुई रनमा कट एण्ड बोल्ड आउट भए । त्यसपछि राशिद खान र नुर अहमदले मुम्बईको ब्याटिङ ध्वस्त पारेका थिए । राशिद खानको आठौं ओभरको तेस्रो बलमा ईशान किशन जोशुवा लिटिलबाट १३ रनमा क्याच आउट भए ।

यसै ओभरको अन्तिम बलमा तिलक बर्मा २ रनमा एलबीडब्लू आउट भए । क्यामरन ग्रीन २६ बलमा ३ छक्कासहित ३३ रनमा आउट भए । उनी नुर अहमदको बलमा बोल्ड आउट भए । नुर अहमदकै बलमा टिम डेविड शून्यमा क्याच आउट भए । नुर अहमदले सूर्यकुमार यादवलाई २३ रनमा एलबीडब्लू आउट गरेपछि मुम्बईको जितको सम्भावना समाप्त जस्तै बनेको थियो । पियुष चवाला १८ र अर्जुन तेन्दुलकर १३ रनमा आउट भए ।

गुजरातका नुर अहमदले ४ ओभरमा ३७ रन खर्चेर ३ विकेट लिए । राशिद खानले ४ ओभरमा २७ रन खर्चेर २ विकेट लिए । मोहित शर्माले ४ ओभरमा ३८ रन खर्चेर २ विकेट लिए । हार्दिक पान्ड्याको नाममा एक विकेट रह्यो ।

त्यसअघि नरेन्द्र मोदी स्टेडियम अहमदाबादमा टस हारेर पहिला ब्याटिङको निम्तो पाएको घरेलु टोली गुजरातले निर्धारित २० ओभरमा ६ विकेट गुमाउँदै २ सय ७ रन बनाएको थियो ।

गुजरातका ओपनर शुभमन गिलले ३४ बलमा ७ चौका र १ छक्कासहित सर्वाधिक ५६ रनमा आउट भए । ऋद्धिमान शाह ४ रनमा आउट भएका थिए । कप्तान हार्दिक पान्ड्या पनि १३ रनमै आउट भएका थिए । डेविड मिलर २२ बलमा २ चौका र ४ छक्कासहित ४६ रनमा आउट भए ।

युवा खेलाडी अभिनव मनोहर २१ बलमा ३ चौका र ३ छक्कासहित ४२ रनमा आउट भएका थिए । राहुल टेवाटिया ५ बलमा ३ छक्कासहित २० रनमा अविजित रहेका थिए ।पाँचौं विकेटका लागि अभिनव र मिलरले ३५ बलमा ७१ रनको उत्कृष्ट साझेदारी गरेका थिए । पियुष चवाला ४ ओभरमा ३४ रन खर्चेर २ विकेट लिए । जेसन बेहरनडोर्फ, अर्जुन तेन्दुलकुरकुमार कार्तिकेयले समान एक विकेट लिए ।

गुजरात ७ खेलमा ५ मा जित र २ मा हारसहित दोस्रो स्थानमा छ । मुम्बई ७ खेलमा ३ मा जित र ४ मा हारसहित सातौं स्थानमा छ । चेन्नई ७ खेलमा ५ मा जित र २ मा हारसहित शीर्ष स्थानमा छ ।

समान ८ अंक भएपनि नेटरनरेटका कारण राजस्थान तेस्रो, लखनऊ चौथो, बेंगलोर पाँचौं र पन्जाब छैटौं स्थानमा छन् । गुजरातले अव शनिबार कोलकातासँग खेल्नेछ । मुम्बईले आइतबार राजस्थान रोयल्ससँग खेल्नेछ । बुधबार आइपिएलमा बेंगलोर र कोलकाताबीच प्रतिस्पर्धा हुनेछ ।