काठमाडौं (हाम्रो खेलकुद)– युएईका स्पिनर आयन खानले एसिसी प्रिमियर कपमा सेमिफाइनलमा पुग्न निर्णायक खेलमा बहराइनविरुद्ध घातक बलिङ गर्नेक्रममा ५५ बल डट राखेका छन् । आयनले १० ओभरमा ७ मेडनसहित ६ रन खर्चेर ४ विकेट लिए ।

आयनले बलिङ गरेको ६० बल मध्य ५५ बल डट राखेका छन् । उनको घातक बलिङसँगै मुलपानी क्रिकेट मैदानमा टस जितेर पहिला ब्याटिङ थालेको बहराइन ३० ओभरमा ९ विकेट गुमाउँदै ९० रन बनाएको छ । बहराइनका कप्तान हैदर बटले ४९ बलमा ४ चौकासहित सर्वाधिक २३ रन बनाए ।

स्पिनर आयन खानको चौथो ओभरको अन्तिम बलमा शहबाज पाँच रनमा एलबीडब्लू आउट भए । रोहन मुस्तफाले पाँचौं ओभरको पाँचौं बलमा जुनैद अजिज शून्यमा एलबीडब्लू आउट भए । लगत्तै अर्को बलमा सोहिल अहमद कट एण्ड बोल्ड आउट भएका थिए ।

अर्को ओभरको पाँचौं बलमा आयन खानले मोहम्मद युनिसलाई १६ रनमा कट एण्ड बोल्ड आउट गरेपछि बहराइन २३-४ को दयनीय अवस्थामा पुगेको थियो ।तल्लोक्रममा अब्दुल मजिद ११ र इमरान अनवारले १४ रन बनाए । त्यस्तै स्पिनर रोहन मुस्तफा र कार्तिक मयाप्पनले समान दुई विकेट लिएका छन् ।

समूह बी मा युएई ३ खेलमा २ मा जित र १ मा हारसहित ४ अंकका साथ दोस्रो स्थानमा छ । बहराइन ३ ओभरमा १ मा जित र १ मा हारसहित ३ अंकका साथ चौथो स्थानमा छ । युएई यस खेलमा विजयी हुँदा सेमिफाइनलमा पुग्नेछ । पराजित हुँदा युएई बाहिरिनेछ । बहराइन विजयी हुँदा भने सेमिफाइनलमा पुग्न कुवेत र हङकङबीचको नतिजा पर्खनु पर्ने हुन्छ ।