काठमाडौं (हाम्रो खेलकुद) – युवा स्पिनर आयन खानले घातक बलिङ गरेपछि एसिसी प्रिमियर कपमा बहराइनले सेमिफाइनलमा पुग्न युएईलाई १ सय १७ रनको सामान्य लक्ष्य दिएको छ ।

मुलपानी क्रिकेट मैदानमा टस जितेर पहिला ब्याटिङ रोजेको बहराइन ४०.५ ओभरमा १ सय १६ रनमा अल आउट भयो । एक समय ८०-९ को अवस्थामा पुगेको बहराइनलाई अन्तिम विकेटका लागि अली दाउद र वासिक अहमदले ३६ रनको साझेदारी गर्दै एक सय रनको योगफल कटाएका थिए ।

अली दाउद ४७ बलमा १ चौका र १ छक्कासहित २३ रनमा नटआउट रहे । वासिक अहमद ४२ बलमा १ चौकासहित १२ रनमा आउट भए । बहराइनका कप्तान हैदर अली बटले ४९ बलमा ४ चौकासहित २३ रन बनाए । अन्यको प्रदर्शन राम्रो हुन सकेन।

स्पिनर आयन खानको चौथो ओभरको अन्तिम बलमा शहबाज पाँच रनमा एलबीडब्लू आउट भए । रोहन मुस्तफाले पाँचौं ओभरको पाँचौं बलमा जुनैद अजिज शून्यमा एलबीडब्लू आउट भए । लगत्तै अर्को बलमा सोहिल अहमद कट एण्ड बोल्ड आउट भएका थिए ।

अर्को ओभरको पाँचौं बलमा आयन खानले मोहम्मद युनिसलाई १६ रनमा कट एण्ड बोल्ड आउट गरेका थिए । एक समय २७(५ को दयनीय अवस्थामा पुगेको बहराइनलाई छैटौं विकेटका लागि हैदर र अब्दुल मजिदले ३० रनको साझेदारी गरेका थिए ।
तल्लोक्रममा अब्दुल मजिद ११ र इमरान अनवारले १४ रन बनाए ।

युएईका स्पिनर आयन खान अफ्जलले १० ओभरमा ७ मेडनसहित ६ रन खर्चेर सर्वाधिक ४ विकेट लिए । आयनले ६० मध्य ५५ बल डट राखेका थिए । रोहन मुस्तफाले १० ओभरमा ४ मेडनसहित १६ रन खर्चेर २ विकेट लिए । कार्तिक मयाप्पनले १० ओभरमा २ मेडनसहित ४८ रन खर्चेर २ विकेट लिए । जहुर खानले एक विकेट लिए ।

समूह बी मा युएई ३ खेलमा २ मा जित र १ मा हारसहित ४ अंकका साथ दोस्रो स्थानमा छ । बहराइन ३ ओभरमा १ मा जित र १ मा हारसहित ३ अंकका साथ चौथो स्थानमा छ । युएई यस खेलमा विजयी हुँदा सेमिफाइनलमा पुग्नेछ ।