काठमाडौं (हाम्रो खेलकुद) – शीर्ष पाँच ब्याटरको अर्धशतकमा ओमानले एसिसी प्रिमियर कपमा सेमिफाइनलमा पुग्न साउदी अरेवियालाई ३ सय ६७ रनको विशाल लक्ष्य दिएको छ । टियु क्रिकेट मैदानमा टस हारेर पहिला ब्याटिङको निम्तो पाएको ओमानले निर्धारित ५० ओभरमा ६ विकेट गुमाउँदै ३ सय ६६ रन बनायो ।

ओमानका ओपनर जतिन्दर सिंहले ७९ बलमा ११ चौका र २ छक्कासहित सर्वाधिक ८८ रनको योगदान दिए । मोहम्मद नदिमले उत्कृष्ट अन्त्य गर्दै ३८ बलमा ६ चौका र ४ छक्कासहित ७१ रनमा अविजित रहे । नसिम खुशी ६ बलमा १२ रनमा अविजित रहे ।
ओमानलाई पहिलो विकेटका लागि जतिन्दर सिंह र कश्याप प्रजापतीले १७.२ ओभरमा १ सय २५ रनको सानदार शतकीय साझेदारीका साथ राम्रो सुरुवात दिलाएका थिए ।

कश्याप ५३ बलमा ६ चौका र २ छक्कासहित ५१ रनमा आउट भए । उनी तीव्र गतिका बलर अब्दुल वहिदको बलमा इश्तिक अहमदबाट क्याच भए । दोस्रो विकेटका लागि शोएब खान र जतिन्दरले ५३ रनको साझेदारी गरेका थिए । जतिन्दर तीव्र गतिका बलर अब्दुल वहिदको बलमा विकेटकिपर हसिब गाफुरबाट क्याच आउट भएका थिए ।

शोएब खान ७० बलमा ८ चौका र २ छक्कासहित ६८ रनमा क्याच आउट भए । तेस्रो विकेटका लागि शोएब र जिशान मकसुदले ६० रनको साझेदारी गरेका थिए । कप्तान जिशान मकसुद ४९ बलमा ४ चौका र २ छक्कासहित ५४ रनमा आउट भए ।

तीव्र गतिका बलर अब्दुल वहिदले १० ओभरमा ६४ रन खर्चेर २ विकेट लिए । तीव्र गतिका बलर अतिफ उर रहमानले ९ ओभरमा ८० रन खर्चेर ३ विकेट लिए । यस खेलको विजेता टोली सेमिफाइनलमा स्थान बनाउनेछ ।