काठमाडौं (हाम्रो खेलकुद) – युएईले एसिसी प्रिमियर कपमा बहराइनलाई ८ विकेटले हराउँदै सेमिफाइनलमा स्थान बनाएको छ । समूह बी बाट युएईले ४ खेलमा ३ मा जित र १ मा हारसहित ६ अंकका साथ शीर्ष स्थानमा रहँदै सेमिफाइनलमा स्थान पक्का गरेको हो ।

जितको लागि १ सय १७ रनको विजयी लक्ष्य पछ्याएको युएईले २७.४ ओभरमा २ विकेट गुमाउँदै पूरा गर्यो । युएईको जितमा युवा खेलाडी वृत्य अरविन्द ८४ बलमा ५ चौका र १ छक्कासहित ६२ रनमा अविजित रहे ।

रोहन मुस्तफा ५६ बलमा ५ चौका र १ छक्कासहित ५० रनमा आउट भए । तेस्रो विकेटका लागि मुस्तफा र अरविन्दले ९९ रनको अविजित साझेदारी गर्दै जित पक्का गराए । कप्तान मोहम्मद वासिम १ र आर्यन लाक्रा ५ रनमा आउट भए । बहराइनका स्पिनर अब्दुल मजिदले १० ओभरमा २९ रन खर्चेर २ विकेट लिए ।

त्यसअघि मुलपानी क्रिकेट मैदानमा टस जितेर पहिला ब्याटिङ रोजेको बहराइन ४०.५ ओभरमा १ सय १६ रनमा अल आउट भएको थियो । एक समय ८०-९ को अवस्थामा पुगेको बहराइनलाई अन्तिम विकेटका लागि अली दाउद र वासिक अहमदले ३६ रनको साझेदारी गर्दै एक सय रनको योगफल कटाएका थिए ।

अली दाउद ४७ बलमा १ चौका र १ छक्कासहित २३ रनमा नटआउट रहेका थिए । वासिक अहमद ४२ बलमा १ चौकासहित १२ रनमा आउट भए । बहराइनका कप्तान हैदर अली बटले ४९ बलमा ४ चौकासहित २३ रन बनाए । अन्यको प्रदर्शन राम्रो हुन सकेन।

स्पिनर आयन खानको चौथो ओभरको अन्तिम बलमा शहबाज पाँच रनमा एलबीडब्लू आउट भए । रोहन मुस्तफाले पाँचौं ओभरको पाँचौं बलमा जुनैद अजिज शून्यमा एलबीडब्लू आउट भए । लगत्तै अर्को बलमा सोहिल अहमद कट एण्ड बोल्ड आउट भएका थिए ।

अर्को ओभरको पाँचौं बलमा आयन खानले मोहम्मद युनिसलाई १६ रनमा कट एण्ड बोल्ड आउट गरेका थिए । एक समय २७-५ को दयनीय अवस्थामा पुगेको बहराइनलाई छैटौं विकेटका लागि हैदर र अब्दुल मजिदले ३० रनको साझेदारी गरेका थिए । तल्लोक्रममा अब्दुल मजिद ११ र इमरान अनवारले १४ रन बनाए ।

युएईका स्पिनर आयन खान अफ्जलले १० ओभरमा ७ मेडनसहित ६ रन खर्चेर सर्वाधिक ४ विकेट लिए । आयनले ६० मध्य ५५ बल डट राखेका थिए । रोहन मुस्तफाले १० ओभरमा ४ मेडनसहित १६ रन खर्चेर २ विकेट लिए । कार्तिक मयाप्पनले १० ओभरमा २ मेडनसहित ४८ रन खर्चेर २ विकेट लिए । जहुर खानले एक विकेट लिए ।

युएई समूह विजेता बन्ने वा उपविजेता बिहीबार कुवेत र हङकङसँगको नतिजापछि निर्धारण हुनेछ । उक्त खेलको विजेता टोली सेमिफाइनलमा स्थान बनाउनेछ । पराजित हुने टोली बाहिरिनेछ । हङकङ ३ खेलमा २ मा जित र १ खेलमा अंक बाँड्दै ५ अंकका साथ दोस्रो स्थानमा छ ।

कुवेत ३ खेलमा २ मा जित र १ मा हारसहित ४ अंकका साथ तेस्रो स्थानमा छ । वर्षाको कारण खेल पुरा हुन नसके वा रद्ध भएमा भने हङकङ सेमिफाइनलमा पुग्नेछ ।

समूह ए बाट नेपाल ३ खेलमा ५ अंकका साथ शीर्ष स्थानमा रहँदै सेमिफाइनलमा पुगेको छ । नेपालले अन्तिम खेल बिहीबार कतारसँग खेल्नेछ । आज साउदी अरेविया र ओमानबीचको विजेता टोलीले सेमिफाइनलमा स्थान बनाउनेछ ।

प्रतियोगिता पहिलो सेमिफाइनल खेलमा समूह ए को विजेताले समूह बी को उपविजेतासँग खेल्नेछ । दोस्रो सेमिफाइनल खेलमा समूह बी को विजेताले समूह ए को उपविजेतासँग खेल्नेछ । सेमिफाइनल शनिबार हुनेछ । फाइनल सोमबार हुनेछ । प्रतियोगिता विजेता टोलीले एसिया कपमा भारत र पाकिस्तासँग खेल्न पाउनेछ ।

शीर्ष तीन टोलीले एसिसी इमर्जिङ टिम्स एसिया कप खेल्न पाउनेछन् । इमर्जिङ टिप्समा एसियाका टेस्ट टोलीका यू(२३ टोलीको सहभागिता रहनेछ । एसिया कप सेप्टेम्बरमा पाकिस्तान र इमर्जिङ टिम्स एसिया कप जुलाईमा हुनेछ।