एजेन्सी – कोलकाता नाइट राइडर्सले इन्डियन प्रिमियर लिग (आइपिएल) २०२३ को ३६ औं खेलमा रोयल च्यालेन्जर्स बेंगलोरलाई २ सय १ रनको विशाल लक्ष्य दिएको छ । चिन्नास्वामीमा टस हारेर पहिला ब्याटिङको निम्तो पाएको कोलकाताले निर्धारित २० ओभरमा ५ विकेट गुमाउँदै २ सय रन बनायो ।

कोलकाताका ओपनर जेसन रोयले २९ बलमा ४ चौका र ५ छक्कासहित सर्वाधिक ५६ रन बनाए । कोलकातालाई ओपनर नारायण जगदिशन र जेसन रोयले ९.२ ओभरमा ८३ रनको साझेदारी गर्दै राम्रो सुरुवात दिलाएका थिए ।

विजय कुमार वैश्यकको बलमा जगदीशन २९ बलमा ४ चौकासहित २७ रनमा डेविड विल्लीबाट क्याच आउट भए । विजयकुमारले नै अर्का ओपनर रोयलाई बोल्ड आउट गरेका थिए ।

कप्तान नितिश राणा २१ बलमा ३ चौका र ४ छक्कासहित ४८ रनमा आउट भए । वेंकटेश ऐर २६ बलमा ३ चौकासहित ३१ रनमा आउट भए । रिंकु सिंह १० बलमा २ चौका र १ छक्कासहित १८ रनमा अविजित रहे । डेविड विजा ३ बलमा २ छक्कासहित १२ रनमा अविजित रहे । मोहम्मद शिराजले आन्द्रे रसेललाई योर्करमा एक रनमा बोल्ड गरे ।

बेंगलोरका वानिन्दु हसरंगाले ४ ओभरमा २४ रन खर्चेर २ विकेट लिए । विजयकुमारले ४ ओभरमा ४१ रन खर्चेर २ विकेट लिए । मोहम्मद शिराजले ४ ओभरमा ३३ रन खर्चेर १ विकेट लिए ।