काठमाडौं (हाम्रो खेलकुद) – कप्तान रोहित पौडेल आउट भएसँगै एसिसी प्रिमियर कपमा घरेलु टोली नेपालविरुद्ध समस्यामा परेको छ । टियु क्रिकेट मैदानमा टस हारेर पहिला ब्याटिङको निम्तो पाएको नेपालले १५.३ ओभरमा ४ विकेट गुमाउँदै ६२ रन बनाएको छ ।

नेपालका सोमपाल कामी ११ बलमा ३ रनमा क्रजमा छन् । उनलाई कुशल मल्लले साथ दिनेछन् । नेपालले ओपनर कुशल भुर्तेललाई दुई रनमै गुमाएको थियो । तीव्र गतिका बलर गयान मुनाविराको दोस्रो ओभरको दोस्रो बलमा कुशल शट लेगमा खुराम शाहजादबाट क्याच आउट भएका थिए । कुशलले ८ बल खेलेका थिए ।

मुनाविराको चौथो ओभरको तेस्रो बलमा स्वीप खेल्ने धुनमा एज लागेर भीम सार्की ६ रनमा विकेटकिपर इमाल लियानागेबाट क्याच आउट भए । ओपनर आसिफ शेख १३ औं ओभरको चौथो बलमा १९ रनमा आउट भए । तीव्र गतिका बलर इक्रमउल्लाह खानको बलमा स्क्वायर लेगमा पुल सट खेल्ने धुनमा मोहम्मद तनविरबाट क्याच आउट भएका थिए । आसिफले २७ बलमा २ चौका प्रहार गरे ।

नेपालले आसिफ आउट भएपछि सोमपाललाई ब्याटिङमा पठाएको थियो । कप्तान रोहित पौडेल ३६ बलमा २ चौकासहित २७ रनमा कट बिहाइन्ड हुँदै पेभेलिएन फर्किए ।

स्पिनर क्वाइस अहमदको १६ औं ओभरको तेस्रो बलमा रोहित कट खेल्ने धुनमा विकेटकिपरबाट क्याच आउट भएका थिए । नेपालले आजको खेलमा करण केसीको स्थानमा गुलशन झालाई मौका दिएको छ । नेपाल समूह विजेता बन्दै सेमिफाइनल खेल्न यस खेल जित्नै पर्ने हुन्छ ।