काठमाडौं (हाम्रो खेलकुद) – एसिसी प्रिमियर कपमा यदि सेमिफाइनल र फाइनल वर्षाको कारण रद्द भएमा नेपालले एसिया कप खेल्न पाउने भएको छ । सेमिफाइनल खेलमा नेपालले आज कुवेतसँग टियुमा खेल्दैछ । दोस्रो सेमिफाइनल खेलमा युएई र ओमानबीच मुलपानीमा प्रतिस्पर्धा हुनेछ ।

नेपाल समूह ए मा ४ खेलमा ३ मा जित र १ खेलमा अंक बाँड्दै ७ अंकका साथ शीर्ष स्थानमा रहेर सेमिफाइनलमा स्थान बनाएको हो । कुवेतले ४ खेलमा ३ मा जित र १ मा हारसहित ६ अंकका साथ दोस्रो स्थानमा रहँदै समूह बी को उपविजेताको रुपमा सेमिफाइनलमा स्थान बनाएको हो ।

युएई ४ खेलमा ३ मा जित र १ मा हारका साथ ६ अंकका साथ शीर्ष स्थानमा रहँदै समूह बी को विजेताको रुपमा स्थान बनाएको हो । ओमान ४ खेलमा ३ मा जित र १ मा हारसहित ६ अंकका साथ समूह ए को उपविजेताको कारण सेमिफाइनलमा स्थान बनाएको हो ।

फाइनल सोमबार हुनेछ । यदि आज पानी परेको खण्डमा पहिला डकवर्थ लेविस पद्धति हेरिने गरिन्छ । डकवर्थ लेविस पद्धति ५० ओभरको खेलमा दोस्रो ब्याटिङ गर्ने टोली (लक्ष्य पछ्याउने) ले २० ओभर खेलेको हुनुपर्छ । यदि दोस्रो टोलीले २० ओभर खेलेको छैन भने डकवर्थ लेविस पद्धतिको आधारमा नतिजा निकाल्न मिल्दैन ।

खेल नै हुन नसेको खण्डमा वा दोस्रो टोलीले २० ओभर ब्याटिङ गरेको छैन भने सुपर ओभरबाट नतिजा निकालिनेछ । सुपर ओभर पनि टाई भएमा अर्को सुपर ओभर हुनेछ । दोस्रो सुपर ओभर टाई भएमा वा सुपर ओभर नै हुन नसक्ने अवस्था भएमा समूह चरणका विजेता टोली फाइनलमा पुग्नेछ । यदि त्यस्तो भएमा समूह विजेताको कारण नेपाल र युएईले फाइनलमा पुग्नेछन् ।

फाइनलमा खेल सोमबार हुन नसके मंगलबार पुन खेल हुनेछ । एसिसीले एकदिन रिजरर्भ डे राखेको छ । यदि रिजर्भ डे मंगलबारमा पनि वर्षाको कारण नतिजा आउन नसकेको खण्डमा सुपर ओभर हुनेछ । सुपर ओभर बढीमा दुई पटक हुनेछ । यदि सुपर ओभरबाट पनि नतिजा आउन नसकेको खण्डमा फाइनलमा ओडिआई वरियतामा माथि हुने टोली च्याम्पियन हुँदै एसिया कप खेल्न पाउनेछ ।

ओडिआई वरियता टोलीमा नेपाल ओमान र युएईभन्दा माथि छ । नेपालको वर्तमान ओडिआई वरियतामा १४ औं स्थानमा छ । ओमान १८ औं र युएई १९ औं स्थानमा ओडिआई वरियतामा छन् । त्यसैले यदि वर्षाको कारण सेमिफाइनल र फाइनल रद्द हुँदा नेपाल ओडिआई वरियताको कारण च्याम्पियन बन्दै सोझै एसिया कप खेल्न पाउनेछ ।

आगमी सेप्टेम्बरमा पाकिस्तानमा हुने एसिया कपमा प्रिमियर कपको विजेताले पाकिस्तान र भारतसँग खेल्न पाउनेछ । सेमिफाइनलमा पराजित हुने दुई टोलीले तेस्रो स्थानका लागि प्रतिस्पर्धा गर्नेछन् ।

शीर्ष तीन टोलीले एसिसी इमर्जिङ टिम्स एसिया कप खेल्नेछन् । इमर्जिङ टिम्स एसिया कपमा भने भारत, पाकिस्तान, बंगलादेश, अफगानिस्तान र श्रीलंकाका यू–२३ को टोली हुनेछ ।