एजेन्सी – गुजरात टाइटन्सले इन्डियन प्रिमियर लिग (आइपिएल) २०२३ को ३९ औं खेलमा कोलकाता नाइट राइडर्सलाई ७ विकेटले हराउँदै अंक तालिकामा शीर्ष स्थानमा उक्लिएको छ । साविक विजेता गुजरात १२ अंकका साथ शीर्ष स्थानमा रहँदै प्लेअफ सम्भावना मजबुत बनाएको छ ।

जितको लागि १ सय ८० रनको विजयी लक्ष्य पछ्याएको गुजरातले १७.५ ओभरमा ३ विकेट गुमाउँदै पूरा गर्यो । गुजरातको जितमा विजय शंकर २४ बलमा २ चौका र ५ छक्कासहित ५१ रनमा अविजित रहे ।

डेविड मिलर १८ बलमा २ चौका र २ छक्कासहित ३२ रनमा अविजित रहे । ओपनर शुभमन गिल ३५ बलमा ८ चौकासहित ४९, ऋद्धिमान शाह १० र हार्दिक पान्ड्या २६ रनमा आउट भए । कोलकाताका हर्षित राना, आन्द्रे रसेल र सुनिल नारायणले समान एक विकेट लिए ।

त्यसअघि घरेलु मैदान इर्डेन पार्कका टस हारेर ब्याटिङको निम्तो पाएको कोलकाताले निर्धारित २० ओभरमा ७ विकेट गुमाउँदै १ सय ७९ रन बनाएको थियो । कोलकाताका ओपनर रहमानाउल्लाह गुरबाजले ३९ बलमा ५ चौका र ७ छक्कासहित सर्वाधिक ८१ रनको इनिङ खेलेपनि टोलीको हार टार्न सकेनन् ।

आन्द्रे रसेलले १९ बलमा २ चौका र ३ छक्कासहित ३४, नारायण जगदीशन शून्य, वेंकटेश ऐर ११, नितिश राणा ४ र रिंक सिंह १९ रनमा आउट भए । डेविड विजा ८ रनमा नटआउट रहे ।

गुजरातका मोहम्मद शामीले ४ ओभरमा ३३ रन खर्चेर ३ विकेट लिए । जोशुवा लिटिल र नुर अहमदले समान दुई विकेट लिए ।
गुजरात ८ खेलमा ६ मा जित र २ मा हारसहित १२ अंकका साथ शीर्षस्थानमा छ । राजस्थान ८ खेलमा ५ मा जित र ३ मा हारसहित १० अंकका साथ दोस्रो स्थानमा छ ।

लखनऊ र चेन्नईको समान १० अंक भएपनि नेटरनरेटको कारण तेस्रो र चौथो स्थानमा छन् । कोलकाता ९ खेलमा ३ मा जित र ६ मा हारसहित ६ अंकका साथ सातौं स्थानमा छ ।