काठमाडौं (हाम्रो खेलकुद) – एसिसी प्रिमियर कपको फाइनलमा नेपाल र युएईबीचको खेल अव वर्षाको कारण रोकिएपनि नतिजा आउने भएको छ । एसिसी प्रिमियर कपको फाइनलमा जितको लागि १ सय १८ रनको विजयी लक्ष्य पछ्याएको नेपालले २० ओभरमा ३ विकेट गुमाउँदै ६८ रन बनाएको छ ।

योसँगै अव यदि वर्षाको कारण खेल रोकिएपनि नतिजा आउनेछ । डकवर्थ लेविस पद्धतिमा नेपालले २० ओभरमा ४७ रन बनाउनु पर्ने हुन्छ । नेपाल अहिले खेलमा २१ रनले अघि छ । त्यसैको कारण अव वर्षाको कारण खेल रोकिएमा सुपर ओभर हुनेछैन । डकवर्थ लेविसमा विकेट अनुसार लक्ष्य पनि परिवर्तन हुने गर्दछ । डकवर्थ लेविस पद्धतिको आधारमा नतिजा आउनेछ ।

नेपालका गुलशन झा ५८ बलमा ३ चौका र ४ छक्कासहित ४७ रनमा क्रिजमा छन् । उनलाई भीम सार्की ३५ बलमा ८ रनमा साथ दिएका छन् । नेपालले दोस्रो ओभरको दोस्रो बलमै ओपनर कुशल भुर्तेललाई १ रनमा गुमाएको थियो । स्पिनर रोहम मुस्तफाको बलमा उनी एलबीडब्लू आउट भएका थिए ।

सातौं ओभरको पहिलो बलमा आयन खानले अर्का ओपनर आसिफ शेखलाई ८ रनमा एलबीडब्लू आउट गरे । आठौं ओभरको अन्तिम बलमा मुस्तफाले कप्तान रोहित पौडेललाई १ रनमै बोल्ड आउट गरेपछि नेपाल २२-३ को अवस्थामा पुगेको थियो ।

युएईले एसिसी प्रिमियर कपको फाइनलमा नेपाललाई एसिया कपको फाइनलमा पुग्न १ सय १८ रनको सामान्य लक्ष्य दिएको छ । टियु क्रिकेट मैदानमा टस हारेर पहिला ब्याटिङको निम्तो पाएको युएई ३३.१ ओभरमा १ सय १७ रनमा अल आउट भयो ।