एजेन्सी – लखनऊ सुपर जायन्ट्सका कप्तान लोकेश राहुलले इन्डियन प्रिमियर लिग (आइपिएल) २०२३ को बाँकी खेल गुमाउने भएका छन् । रोयल च्यालेन्जर्स बेंगलोरविरुद्ध यसै साता फिल्डिङ गर्नेक्रममा घाइते भएका थिए । दोस्रो ओभरमै राहुल फिल्डिङ गर्नेक्रममा दायाँ खुट्टाको मांशपेशीमा चोट लाग्न पुगेको थियो ।

घाइते लगत्तै मैदानबाट बाहिरिएका राहुलले उक्त खेलमा ११ औं नम्बरमा ब्याटिङ गर्दै ३ बल खेलेका थिए । राहुलको खुट्टाको शल्यक्रिया गर्नुपर्ने भएको छ । राहुलले आगमी जुनमा इंग्ल्यान्डमा हुने अष्ट्रेलियासँगको आइसिसी विश्व टेस्ट च्याम्पियनसिप (डब्लूटिसी) २०२३ को फाइनल पनि गुमाउने भएका छन् ।

३१ वर्षीय राहुल नहुँदा लखनऊ र भारत दुबैलाई ठूलो घाटा लाग्नेछ । राहुल भारतका भरपर्दा ब्याटर हुन् । राहुल घाइते हुँदा फाइनल खेलमा भारतले शरफाज खानलाई मौका दिनसक्ने सम्भावना छ । त्यस्तै आइपिएलमा सानदार प्रदर्शन गरेका राजस्थान रोयल्सका यशस्वी जैसवाल र चेन्नई सुपर किंग्सका ऋतुराज गायकवाडको पनि चर्चा छ ।

यस सिजनको आइपिएलमा लखनऊ १० खेलमा ५ मा जित, ४ मा हार र १ खेलमा अंक बाँड्दै ११ अंकका साथ दोस्रो स्थानमा छ । लखनऊले अव आइतबार गुजरात टाइटन्ससँग खेल्नेछ । राहुलले यस सिजनमा ९ खेलमा २ मा अर्धशतकसहित कुल २ सय ७४ रन बनाएका थिए ।

उक्त रन बनाउन राहुलले २ सय ४२ बल खेलेका थिए । सुस्त ब्याटिङ शैलीका कारण राहुल केहि आलोचनामा समेत परेका थिए । राहुल नहुँदा चेन्नई सुपर किंग्सविरुद्ध खेलमा लखनऊको कप्तानी क्रुनाल पान्ड्याले गरेका थिए । राहुलको स्थानमा मनान बोहरा खेलेका थिए ।