काठमाडौं (हाम्रो खेलकुद) – नेपालले आइसिसी एकदिवसीय विश्वकप छनोट अघि दक्षिण अफ्रिकामा स्कटल्यान्ड र नेदरल्यान्ड्ससँग अभ्यास खेल खेल्ने भएको छ । नेपाल क्रिकेट संघ (क्यान) का कार्यवाहक सचिव दुर्गाराज पाठकले स्कटल्यान्ड र नेदरल्यान्ड्ससँग अभ्यास खेल खेल्ने बताएका छन् ।

‘अभ्यास खेलको लागि दक्षिण अफ्रिकासँग कुरा गरेका छौं । हामीले एउटा ए टिम दिनपर्यो भनेका छौं । वहाँहरु सकरात्मक नै हुनुन्छ । त्यो नभए पनि स्कटल्यान्ड र नेदरल्यान्ड्ससँग वार्मअप खेल्ने कुरा भएको छ’, पाठकले हाम्रो खेलकुदसँग भने ।

ओडिआई हुँदा खर्च बढ्ने हुँदा अभ्यास खेल हुने पाठकले बताए । ‘ओडिआई चाहिँ नहुने भयो । ओडिआई हुँदा खर्च बढ्ने रहेछ । दक्षिण अफ्रिकामा नेपालको बसाई १० देखि १२ दिनको हुनेछ’, उनले भने ।

१० टोली सहभागी विश्वकप छनोट आगमी जुन १८ देखि जुलाई ९ सम्म जिम्बावेमा हुनेछ । नेपाल मे अन्तिममा जिम्बावे जानेछ । विश्वकप छनोटमा नेपाल, स्कटल्यान्ड, ओमान, युएई, अमेरिका, श्रीलंका, वेस्टइन्डिज, जिम्बावे, आयरल्यान्ड र नेदरल्यान्ड्स छन् ।

यी १० टोलीलाई आइसिसीले दुई समूह विभाजन गर्नेछ। हालसम्म आइसिसीले समूह विभाजन गरेको छैन । श्रीलंका र वेस्टन्डिज फरक समूहमा हुने पक्कापक्की छ। चाँडैनै समूह विभाजन गर्नेछ। हरेक समूहमा पाँच टोली हुनेछन् ।

हरेक समूहबाट शीर्ष तीन टोली सुपर सिक्समा स्थान बनाउनेछन् । सुपर सिक्समा हरेक टोलीले एक अर्कासँग खेल्नेछन् । जसबाट शीर्ष दुई टोली फाइनलमा पुग्नेछन् । फाइनलमा पुग्ने दुई टोलीले नै भारतमा हुने एकदिवसीय विश्वकप खेल्न पाउनेछन् ।