एजेन्सी – मध्यक्रमका विकेटकिपर हेनरिक क्लासेनको शतकमा सनराइजर्स हैदराबादले इन्डियन प्रिमियर लिग (आइपिएल) २०२३ को ६५ औं खेलमा रोयल च्यालेन्जर्स बेंगलोरलाई १ सय ८७ रनको बलियो लक्ष्य दिएको छ । टस हारेर पहिला ब्याटिङको निम्तो पाएको घरेलु टोली हैदराबादले २० ओभरमा ५ विकेट गुमाउँदै १ सय ८६ रन बनायो ।

हैदराबादका विकेटकिपर हेनरिक क्लासेनले ५१ बलमा ८ चौका र ६ छक्कासहित सर्वाधिक १ सय ४ रनको उत्कृष्ट शतकीय इनिङ खेले । उनको यो आइपिएल करिअरको पहिलो शतक हो । हर्षल पटेललाई १९ औं ओभरको तेस्रो बलमा छक्का हान्दै उनले ४९ बलमा शतक पूरा गरेका थिए । उनी शतक प्रहार गरेको दुई बलपछि बोल्ड आउट भएका थिए ।

चौथो विकेटका लागि ह्यारी ब्रुक र हेनरिक क्लासेनले ३६ बलमा ७४ रनको साझेदारी गरेका थिए । ब्रुक १७ बलमा २ चौका र १ छक्कासहित २७ रनमा अविजित रहे ।

त्यसपघि कप्तान एडेन माक्ररम र क्लासेनले तेस्रो विकेटका लागि ५० बलमा ७६ रनको साझेदारी गरेका थिए । माक्ररम २० बलमा १८ रनमा आउट भए । ओपनर अभिषेक शर्मा ११ र राहुल त्रिपाठी १५ रनमा आउट भएका थिए । दुबै ओपनर स्पिनर माइकल ब्रेसवेलको बलमा क्याच आउट भएका थिए ।

बेंगलोरका माइकल ब्रेसवेलले २ ओभरमा १३ रन खर्चेर २ विकेट लिए । मोहम्मद शिराजले ४ ओभरमा १७ रन खर्चेर १ विकेट लिए । हर्षल पटेल र शहबाज अहमदले समान एक विकेट लिए । बेंगलोरलाई प्लेअफमा पुग्न यो खेल जित्नैपर्ने हुन्छ । हैदराबाद प्लेअफ दौडबाट बाहिरि सकेको छ ।