एजेन्सी – महेन्द्रसिंह धोनीको कप्तानीमा रहेको चेन्नई सुपर किंग्सले इन्डियन प्रिमियर लिग (आइपिएल) २०२३ को ६७ औं खेलमा दिल्ली क्यापिटल्समाथि ७७ रनको सानदार जितका साथ प्लेअफमा स्थान पक्का गरेको छ । चार पटकको च्याम्पियन चेन्नईले १७ अंकका साथ प्लेअफमा स्थान पक्का गरेको हो ।

जितको लागि २ सय २४ रनको विशाल विजयी लक्ष्य पछ्याएको दिल्लीले निर्धारित २० ओभरमा ९ विकेट गुमाउँदै १ सय ४६ रन बनायो ।

दिल्लीका कप्तान डेविड वार्नरले ५८ बलमा ७ चौका र ५ छक्कासहित सर्वाधिक ८६ रन बनाएपनि टोलीको हार टार्न सकेनन् । दिल्लीका पृथ्वी शा ५, फिलिप साल्ट ३, राइली रोसोउ डक, यश धुल १३, अक्षर पटेल १५ र अमन खान हाकिमले ७ रन बनाए ।

चेन्नईका तीव्र गतिका बलर दीपक चाहरले ४ ओभरमा २२ रन खर्चेर ३ विकेट लिए । महेश पाथिरानाले ४ ओभरमा २२ रन खर्चेर २ विकेट लिए । तुषारदेश पाण्डे र रविन्द्र जडेजाले समान एक विकेट लिए । स्पिनर महेश थिक्सेनाले ४ ओभरमा १ मेडनसहित २३ रन खर्चेर २ विकेट लिए ।

त्यसअघि दिल्लीमा टस जितेर पहिला ब्याटिङको रोजेको चेन्नईले निर्धारित २० ओभरमा ३ विकेट गुमाउँदै २ सय २३ रन बनाएको थियो । चेन्नईका ओपनर डेभन कन्वेले ५२ बलमा ११ चौका र ३ छक्कासहित ८७ रनमा आउट भए । अर्का ओपनर ऋतुराज गायकवाड ५० बलमा ३ चौका र ७ छक्कासहित ७९ रनमा आउट भए ।

चेन्नईलाई ओपनर कन्वे र गायकवाडले पहिलो विकेटका लागि १४.३ ओभरमा १ सय ४१ रनको सानदार शतकीय साझेदारीका साथ विशाल योगफलको आधार तय गरेका थिए । शिवम दुबे ९ बलमा ३ छक्कासहित २२ रनमा आउट भए ।

धोनी ४ बलमा ५ रनमा नटआउट रहे । रविन्द्र जडेजा ७ बलमा ३ चौका र १ छक्कासहित २० रनमा नटआउट रहे । दिल्लीका खलिल अहमद, एनरिच नोर्किया र चेतन सकारियाले समान एक विकेट लिए ।

चेन्नई १४ खेलमा ८ मा जित र ५ मा हारका साथ १७ अंकका सात दोस्रो स्थानमा छ । आजनै लखनऊ र कोलकाताबीच प्रतिस्पर्धा हुँदैछ । लखनऊ विजयी हुँदा १७ अंक हुनेछ । लखनऊ विजयी भएमा नेटरनरेटमा माथि रहने टोली दोस्रो स्थानमा रहँदै पहिलो क्वालिफायरमा गुजरात टाइटन्ससँग प्रतिस्पर्धा गर्नेछ।

तर लखनऊ आजको खेलमा पराजित भएमा चेन्नई र गुजरात पहिलो क्वालिफायर खेल्नेछन् । गुजरात १३ खेलमा ९ मा जित र ४ मा हारसहित १८ अंकका साथ शीर्षस्थानमा छ । लखनऊ १७ खेलमा ७ मा जित र ५ मा हारका साथ १५ अंक जोड्दै तेस्रो स्थानमा छ ।