एजेन्सी – इन्डियन प्रिमियर लिग (आइपिएल) २०२३ पहिलो क्वालिफायर खेलमा चेन्नई सुपर किंग्स र गुजरात टाइटन्सबीच प्रतिस्पर्धा हुने भएको छ । गुजरात शीर्ष र चेन्नई दोस्रो स्थानमा रहँदै क्वालिफायर खेल्ने भएका हुन् ।

गुजरात १३ खेलमा ९ मा जित र ४ मा हारसहित १८ अंकका साथ शीर्ष स्थानमा छ । गुजरात एक खेल अगावै नै शीर्ष स्थानमा रहने पक्का भएको हो । चेन्नई १४ खेलमा ८ मा जित र ५ मा हारसहित १७ अंकका साथ दोस्रो स्थानमा अन्त्य गर्यो ।

लखनऊ १४ खेलमा ८ मा जित र ५ मा हारसहित १७ अंकका साथ तेस्रो स्थानमा छ । चेन्नईको नेटरनरेट ०.६५२ र लखनऊको ०.२८४ छ । चेन्नई नेटरनरेटको कारण दोस्रो स्थानमा रहँदै क्वालिफायर खेल्ने अवसर पाएको हो।

क्वालिफायर खेल मंगलबार चेन्नईमा हुनेछ । उक्त खेलको विजेता टोली फाइनलमा पुग्नेछ । पहिलो क्वालिफायरमा पराजित हुने टोलीले एलिमिनेटर खेलको विजेतासँग दोस्रो क्वालिफायर खेल्नेछ । दोस्रो क्वालिफायरको विजेता फाइनलमा पुग्नेछ। एलिमिनेटर खेल बुधबार हुनेछ ।

लखनऊले एलिमिनेटर खेल्ने पक्का भएको छ । लखनऊसँग अव मुम्बई इन्डियन्स, राजस्थान रोयल्स र रोयल च्यालेन्जर्स बेंगलोर मध्य एक टोलीसँग खेल्नेछन् । आज आइपिएलका अन्तिम दुई खेल हुँदैछन् । आजको पहिलो खेलमा मुम्बई इन्डियन्स र सनराइजर्स हैदराबादबीच प्रतिस्पर्धा हुनेछ ।

मुम्बई १३ खेलमा ७ मा जित र ६ मा हारका साथ १४ अंकका साथ छैटौं स्थानमा छ । मुम्बई आजको खेलमा विजयी हुँदा १६ अंक हुनेछ । तर त्यतिले मात्रै प्लेअफमा पुग्दैन । उता आज साँझ रोयल च्यालेन्जर्स बेंगलोर र गुजरातबीच लिगको अन्तिम खेल हुनेछ ।

बेंगलोर १३ खेलमा ७ मा जित र ६ मा हारसहित १४ अंकका साथ चौथो स्थानमा छ । बेंगलोर आजको खेलमा विजयी हुँदा १६ अंक हुनेछ । यदि आज दुबै खेलमा बेंगलोर र मुम्बई विजयी भएमा नेटरनरेटमा माथि रहने टोली प्लेअफमा पुग्नेछन् । मुम्बई प्लेअफमा पुग्न विशाल जितको अन्तर आवश्यक पर्दछ ।

मुम्बईको नेटरनरेट माइनस ०.१२८ र बेंगलोरको प्लस ०.१८० छ । नेटरनरेटमा बेंगलोरमाथि रहने उच्च सम्भावना देखिन्छ । तर आजको दुबै खेलमा मुम्बई र बेंगलोर पराजित भएमा राजस्थान रोयल्स प्लेअफ खेल्ने उच्च सम्भावनाछ । राजस्थान १४ खेलमा ७ मा जित र ७ मा हारसहित १४ अंकका साथ पाचौं स्थानमा छ । राजस्थानको नेटरनरेट प्लस ०.१४८ छ ।

दोस्रो क्वालिफायर शुक्रबार र फाइनल आइतबार हुनेछ । दोस्रो क्वालिफायर र फाइनल भने नरेन्द्र मोदी स्टेडियम अहमदाबादमा हुनेछ ।