एजेन्सी – युवा अलराउन्डर क्यामरन ग्रीनको उत्कृष्ट शतकमा मुम्बई इन्डियन्सले इन्डियन प्रिमियर लिग (आइपिएल) २०२३ को ६९ औं खेलमा सनराइजर्स हैदराबादलाई ८ विकेटले पराजित गरेको छ । मुम्बई यस जितसँगै अंक तालिकामा चौथो स्थानमा उक्लिदै प्लेअफ सम्भावना कायमै राखेको छ ।

यदि आजको अन्तिम खेलमा रोयल च्यालेन्जर्स बेंगलोर गुजरात टाइटन्ससँग पराजित भएमा वा वर्षाको कारण खेल रद्द भएमा मुम्बई प्लेअफमा पुग्नेछ । बेंगलोर विजयी भएमा मुम्बई भने बाहिरिनेछ ।

जितको लागि २ सय १ रनको विशाल विजयी लक्ष्य पछ्याएको मुम्बईले १८ ओभरमा २ विकेट गुमाउँदै पूरा गर्यो । मुम्बईको जितमा क्यामरन ग्रीन ४७ बलमा ८ चौका र ८ छक्कासहित १ सय रनमा अविजित रहे ।

१८ औं ओभरको अन्तिम बलमा एक रन बटुल्दै ग्रीनले आफ्नो टि२० करिअरकै पहिलो शतक पूरा गरे । ग्रीनलाई मुम्बईले गत डिसेम्बरमा अक्सनमा १७ करोड ५० लाख भारु (झन्डै २८ करोड नेपाली रुपैयाँ) मा किनेको थियो । यसअघिका खेलमा औसत प्रदर्शन गर्दै आएका ग्रीनले यस खेलमा सानदार प्रदर्शन गरेका हुन् ।

दोस्रो विकेटका लागि रोहित शर्मा र क्यामरन ग्रीनले ६५ बलमा १ सय २८ रनको सानदार शतकीय साझेदारी गरेका थिए । रोहित मयंक डागरको १४ औं ओभरको पहिलो बलमा नितिश कुमार रेड््डीबाट क्याच आउट भए । रोहितले ३७ बलमा ८ चौका र १ छक्कासहित ५६ रन बनाए ।

सूर्य कुमार यादव १६ बलमा ४ चौकासहित २५ रनमा अविजित रहे । ईशान किशन १२ बलमा १ चौका र १ छक्कासहित १४ रनमा आउट भए । हैदराबादका भुवनेश्वर कुमार र मयंक डागरले समान एक विकेट लिए ।

त्यसअघि वानखडे स्टेडियम मुम्बईमा टस हारेर पहिला ब्याटिङको निम्तो पाएको हैदराबादले निर्धारित २० ओभरमा ५ विकेट गुमाउँदै २ सय रन बनाएको थियो । हैदराबादका मयंक अग्रवालले ४६ बलमा ८ चौका र ४ छक्कासहित सर्वाधिक ८३ रनको योगदान दिएपनि टोलीलाई जित दिलाउन सकेनन् । अर्का ओपनर विभ्रान्त शर्माले ६९ बलमा ९ चौका र २ छक्कासहित ६९ रन बनाए ।

पहिलो विकेटका लागि शर्मा र अग्रवालले १३.५ ओभरमा १ सय ४० रनको सानदार शतकीय साझेदारी गरेका थिए । हेनरिक क्लासेन १८, ग्लेन फिलिप्स १ र ह्यारी ब्रुक शून्यमा आउट भए । एडेन माक्ररम ७ बलमा १ छक्कासहित १३ रनमा नटआउट रहे । मुम्बईका आकाश माधलले ४ ओभरमा ३७ रन खर्चेर सर्वाधिक ४ विकेट लिए । क्रिस जोर्डनको नाममा एक विकेट रह्यो ।

गुजरात टाइटन्स शीर्ष र चेन्नई सुपर किंग्स दोस्रो स्थानमा रहँदै पहिलो क्वालिफायर खेल्ने पक्का भएको छ । उता लखनऊ सुपर जायन्ट्सले तेस्रो स्थानमा अन्त्य गरेको छ । मुम्बई १४ खेलमा ८ मा जित र ६ मा हारका साथ १६ अंकका साथ चौथो स्थानमा छ । मुम्बई प्लेअफ खेल्न आजको खेलमा रोयल च्यालेन्जर्स बेंगलोरले गुजरात टाइटन्ससँग पराजित हुनुपर्छ ।

बेंगलोर १३ खेलमा ७ मा जित र ६ मा हारका साथ १४ अंकका साथ पाँचौं स्थानमा छ । बेंगलोर विजयी भएसँगै १६ अंक हुँदा नेटरनरेटको कारण चौथो स्थानमा रहँदै एलिमिनेटर खेल खेल्नेछ । बेंगलोरको नेटरनरेट प्लस ०.१८० छ । उता मुम्बईको नेटरनरेट माइनस ०.०४४ छ ।

राजस्थान १४ खेलमा ७ मा जित र ७ मा हारसहित १४ अंकका साथ छैटौं स्थानमा रहेर बाहिरियो । मुम्बईको जितसँगै राजस्थानको १४ अंकमा प्लेअफ खेल्ने सम्भावना समाप्त भएको हो ।

पहिलो क्वालिफायर चेन्नई र गुजरातबीच मंगलबार प्रतिस्पर्धा हुनेछ । उक्त खेलको विजेता टोली फाइनलमा पुग्नेछ । पराजित हुने टोलीले दोस्रो क्वालिफायर खेल्नेछ । एलिमिनेटर खेल बुधबार हुनेछ । एलिमिनेटरको विजेताले पहिलो क्वालिफायरमा पराजित हुने टोलीसँग दोस्रो क्वालिफायर खेल्नेछ। दोस्रो क्वालिफायर शुक्रबार र फाइनल आइतबार हुनेछ ।