एजेन्सी – इन्डियन प्रिमियर लिग (आइपिएल) २०२३ को एलिमिनेटर खेलमा आज मुम्बई इन्डियन्स र लखनऊ सुपर जायन्ट्सबीच प्रतिस्पर्धा हुँदैछ । खेल नेपाली समय अनुसार साँझ ७ : ४५ मा चेन्नईको घरेलु मैदान एमए चिदाम्बरम रंगाशालामा सुरु हुनेछ।

यस खेलको विजेता टोली दोस्रो क्वालिफायरमा स्थान बनाउनेछ । पहिलो क्वालिफायर खेलमा चेन्नई सुपर किंग्सले गुजरात टाइटन्सलाई १५ रनले हराउँदै फाइनलमा स्थान बनाएको छ । शुक्रबार गुजरात र एलिमनिटेरबीच खेल हुनेछ । जसको विजेता टोलीले आइतबार फाइनलमा चेन्नईसँग खेल्नेछ ।

लखनऊ १७ अंकका साथ तेस्रो र मुम्बई १६ अंकका साथ अन्तिम चारमा रहँदै प्लेअफमा स्थान बनाएका थिए । लिग चरणको खेलमा लखनऊले मुम्बईलाई ५ रनले हराएको थियो । लखनऊ र मुम्बईबीच तीन खेल हुँदा सबै खेलमा लखनऊ विजयी भएको छ ।

मुम्बईका कप्तान रोहित शर्मा र लखनऊका क्रुनाल पान्ड्या दुबैले एक अर्कालाई राम्रोसँग बुझेका छन् । मुम्बईमा रोहित र क्रुनालले लामो समयसँगै खेलेको अनुभव छ । यस खेलमा पराजित हुने टोली बाहिरिने हुँदा दुबै टोली जितका साथ दोस्रो क्वालिफायरमा स्थान बनाउन चाहन्छन् ।

मुम्बईलाई अन्तिम खेलमा जिताउन युवा अलराउन्डर क्यामरन ग्रीनले हैदराबादविरुद्ध ४७ बलमा १ सय रनको शतकीय इनिङ खेलेका थिए । एलिमिनेटर अघि ग्रीनको उक्त प्रदर्शनले मुम्बईको आत्माविश्वास नै फेरिएको छ ।

मुम्बईमा टि२० विशेष खेलाडीको बाहुल्यता छ । रोहित शर्मा, ईशान किशन, क्यामरन ग्रीन, सूर्यकुमार यादव र टिम डेविड जस्ता प्रसिद्ध टि२० खेलाडी छन् । यी मध्य दुई खेलाडी चलेको खण्डमा मुम्बईले सहज जित हात पार्नसक्छ । जसमा सूर्य र मुम्बईको प्रदर्शन निकै महत्वपूर्ण हुनेछ ।

मुम्बईको बलिङ आक्रामण भने कमजोरीको रुपमा छ । चोटका कारण जस्प्रित बुमराह र जोफ्रा आर्चर दुबै बलर नहुँदा मुम्बई केहि समस्यामा परेको हो । हैदराबादविरुद्ध आकाश माधलले ४ विकेट लिँदै राम्रो आशा जगाएका थिए । जेसन बेहर्नडोर्फ र आकाशको जोडीले जिम्मेवारी प्रदर्शन गर्नुपर्ने हुन्छ । उता अनुभवी स्पिनर पियुष चवालाले पनि राम्रो प्रदर्शन गर्दै आएका छन् ।

यता लखनऊले टोलीमा परिवर्तन गर्ने सम्भावनाछ । पछिल्लो खेलमा कोलकाताविरुद्ध कर्ण शर्मालाई ओपनिङ गराएको थियो । लखनऊले कायल मेयर्सलाई ओपनिङमा मौका दिनसक्छ । उनलाई मौका दिन नविन उल हकलाई बेन्चमा राख्ने सम्भावना छ । निकोलस पुरन राम्रो लयमा छन् ।

उनको प्रदर्शन आजको खेलमा निकै महत्वपूर्ण हुनेछ । मार्कस स्टोइनिस र क्विन्टन डि कक प्रमुख ब्याटर हुन् । यी दुई ब्याटरबाट ठूलो इनिङ चाहन्छ । लखनऊको बलिङ आक्रामण भारतीय बलरमा बढी निर्भर रहेछ ।

भारतीय स्पिनर रवि विश्रोईले लगातार राम्रो प्रदर्शन गर्दै आएका छन् । तीव्र गतिका बलरमा मोहसिन खान र यश ठाकुर छन् । चेन्नईमा स्पिनरलाई सहयोग मिल्ने हुँदा क्रुनाल र कृष्णाप्पा गौतमको प्रदर्शन पनि महत्वपूर्ण हुनसक्छ ।