काठमाडौं (हाम्रो खेलकुद) – नेपालले मलेसियासँगको पहिलो महिला टि२० आई खेलमा खराब सुरुवात गरेको छ । टस हारेर पहिला ब्याटङको निम्तो पाएको भ्रमण टोली नेपालले ५ ओभरमा ३ विकेट गुमाउँदै १९ रन बनाएको छ । नेपालको क्रिजमा डेब्यू खेल खेलेकी सम्झना खड्का ५ र ज्योति पाण्डे शून्यमा क्रिजमा छन् ।

नेपालले सुरुवातमै शीर्ष तीन ब्याटरलाई गुमाएपछि कमजोर सुरुवात गरेको हो । तीव्र गतिकी बलर ऐश्या एलिसाले दोस्रो ओभरको पाँचौं बलमा ओपनर सीता रानामगरलाई शून्यमा पेभेलिएन फर्काइन् ।

उनी आउट साइड एज लागेर विकेटकिपर वान जुलियाबाट क्याच आउट भएकी थिइन् । अर्को ओभरको पहिलो बलमा आइना हामिजाहले अर्की ओपनर काजोल श्रेष्ठलाई मास एलिसाबाट ६ रनमा क्याच गराइन् । काजोलले ११ बलमा एक चौका प्रहार गरिन् ।

एलिसाले इन्दु बर्मालाई ३ रनमा बोल्ड गरेपछि नेपाल ३.३ ओभरमा १२(३ को अवस्थामा पुगेको थियो । नेपालले यस खेलमा सम्झना खड्का र कृतिका मरासिनीलाई डेब्यू दिएको छ । खेल पाँच महिला टि२० आईको हुनेछ ।

नेपालको प्लेइङ ११ : अप्सरी बेगम, अश्मिना कर्माचार्य, ईन्दु बर्मा, ज्योति पान्डे, कविता जोशी, कविता कुँवर, काजोल श्रेष्ठ, कृतिका मरासिनी, रुविना क्षेत्री, सम्झना खड्का, सीता रानामगर ।