एजेन्सी – युवा ब्याटर साई सुदर्शनले सानदार ब्याटिङ गरेपछि साविक विजेता गुजरात टाइटन्सले इन्डियन प्रिमियर लिग (आइपिएल) २०२३ को फाइनलमा चेन्नई सुपर किंग्सलाई उपाधि जित्न २ सय १५ रनको विशाल लक्ष्य दिएको छ । नरेन्द्र मोदी स्टेडियम अहमदाबादमा टस हारेर पहिला ब्याटिङ थालेको घरेलु टोली गुजरातले निर्धारित २० ओभरमा ४ विकेट गुमाउँदै २ सय १४ रन बनायो ।

गुजरातलाई विशाल योगफलमा पुर्याउन सुदर्शनले ४७ बलमा ८ चौका र ६ छक्कासहित सर्वाधिक ९६ रनको इनिङ खेले । अन्तिम ओभरमा मथिसा पाथिरानालाई लगातार तेस्रो छक्का हान्ने धुनमा एलबीडब्लू आउट भएपछि शतक पूरा गर्न चार रनले चुकेका थिए ।

गुजरातका अनुभवी विकेटकिपर ऋद्धिमान शाहले ३९ बलमा ५ चौका र १ छक्कासहित ५४ रनमा आउट भए । त्यस्तै शुभमन गिल २० बलमा ७ चौकासहित ३९ रनमा आउट भए । गुजरातका प्रमुख ब्याटर शुभमन गिलले दोस्रो ओभरमै ठूलो जीवनदान पाए । तुषार देशपान्डेको दोस्रो ओभरको चौथो बलमा दीपक चाहरले ब्यक्तिगत तीन रनमा ब्याकवार्ड स्क्वायरमा सहज क्याच छाडेका थिए ।

गिलले पुन १७ रनमा जीवनदान पाएका थिए । दीपक चाहर पाँचौं ओभरको पहिलो बलमा गिललाई कट एन्ड बोल्ड आउट गर्ने अवसर गुमाएका थिए । सातौं ओभरको दोस्रो बलमा जडेजाले गिललाई ३६ रनमा रन आउट गर्ने अवसर चुकाएका थिए । गुजरातले पहिलो पावर प्लेमा ६२ रन जोडेको थियो ।

गिल जडेजाको सातौं ओभरको अन्तिम बलमा धोनीबाट स्टम्पिङ आउट भए । जडेजाको बल मिस भएपछि धोनीले उत्कृष्ट स्टम्पिङका साथ पहिलो विकेट चेन्नईलाई दिलाएका हुन् ।

पहिलो विकेटका लागि गिल र ऋद्धिमान शाहले ७ ओभरमा ६७ रनको साझेदारी गरेका थिए । दोस्रो विकेटका लागि शाह र ऋद्धिमान शाहले ४२ बलमा ६४ रनको साझेदारी गरेका थिए । शाह दीपक चाहरको बलमा टप एज लागेर धोनीबाट १४ औं ओभरको अन्तिम बलमा क्याच आउट भए।

हार्दिक पान्ड्या १२ बलमा २ छक्कासहित २१ रनमा नट आउट रहे । तेस्रो विकेटका लागि हार्दिक र सुदर्शनले ३३ बलमा ८१ रनको साझेदारी गरेका थिए । चेन्नईका मथिसा पाथिरानाले ४ ओभरमा ४४ रन खर्चेर २ विकेट लिए । दीपक चाहर र रविन्द्र जडेजाले समान एक विकेट लिए । तुषार देशपान्डेले ४ ओभरमा ५६ रन बनाए ।