राकेश तिमल्सिना
चितवन – चौथो क्याची शिव पौडेल स्मृति कपमा शनिबार हेटौँडा सिटी कलेज विजयी भएको छ । हेटौँडाले साविक उपविजेता काठमाडौँको हर्टल्याण्ड कलेजलाई २० रनले हरायो । पहिलो खेल गुमाएको हेटौँडाले सेमिफाइनल प्रवेशका लागि भोलीको खेलको नतिजा कुर्नुपर्ने भएको छ ।

विशाल चोकको नौ बिगाहा मैदानमा १ सय ४७ रनको लक्ष्य पछ्याएको हर्टल्याण्ड २० ओभरमा १ सय २६ रनमा समेटियो । टोलीक निलेन्द्र प्रतापले ४२ र भिम सार्कीले २७ रन बनाए । बाँकी खेलाडी दोहोरो अंकमा रन बनाउन सकेनन् । बलिङतर्फ हेटौँडाका सौरभ सिंह पेला, मणिराज पौडेल र रिजन ढकालले २/२ विकेट लिए ।
त्यसअघि टस जितेर ब्याटिङ राजेकोे हेटौँडाले निर्धारित २० ओभरमा ५ विकेट गुमाउदै १ सय ४६ रन बनाएको थियो । हेटौँडाको जितमा कप्तान रविन गुरुङले ३३, सौरभ सिंह पेलाले ३० र रवि थापाले २९ रन बनाए । बलिङतर्फ हर्टल्याण्डका आशिष पोखरेल र दिनेश आग्रीले २/२ विकेट लिए । अलराउन्ड प्रदर्शन गरेका सौरभ सिंह पेला खेलको म्यान अफ द म्याच घोषित भए ।

क्याची एसएसपी कपमा आइतबारको खेल
वेस्टर्न क्रिकेट एकेडेमी, बुटवलविरुद्ध हर्टल्याण्ड कलेज काठमाडौँ (समूह चरणको अन्तिम खेल)
कृषि तथा वन विश्वविद्यालय, रामपुरविरुद्ध क्यापिटल कलेज, काठमाडौं (पहिलो सेमिफाइनल)