एजेन्सी – मध्यक्रमका बायाँ हाते ब्याटर चरिथ असलंकाको उत्कृष्ट ब्याटिङमा श्रीलंकाले पहिलो ओडिआई खेलमा अफगानिस्तानलाई २ सय ६९ रनको प्रतिस्पर्धात्मक लक्ष्य दिएको छ ।

टस हारेर पहिला ब्याटिङको निम्तो पाएको श्रीलंका निर्धारित ५० ओभरमा २ सय ६८ रनमा अल आउट भयो । श्रीलंकाका चरिथ असलांका ९५ बलमा १२ चौकासहित ९१ रनमा रन आउट भए । अन्तिम ओभरको पहिलो बलमा रन आउट भएपछि उनी ओडिआई करिअरको दोस्रो शतक बनाउन ९ रनले चुकेका थिए ।

धनन्जय डि सिल्भा ५९ बलमा ५ चौकासहित ५१ रनमा आउट भए । पाँचौं विकेटका लागि चरिथ र डी सिल्भाले १ सय ८ बलमा ९९ रनको साझेदारी गरेका थिए । तीव्र गतिका बलर फजलहक फारुकीको बलमा अनुभवी ओपनर दिमुथ करुणारत्ने ४ रनमै एज लागेर रहमात शाहबाट क्याच आउट भएका थिए ।

लामो समयपछि ओडिआई टोलीमा फर्किएका दिमुथको सुरुवात राम्रो हुन सकेन । फारुहकीकै बलमा स्क्वायर लेगमा कुशल मेन्डिस शाहबाट ११ रनमा क्याच आउट भएका थिए । एन्जिलो म्याथ्युज १२ र दासुन शनाका १७ रनमा आउट भए । डेब्यू खेल खेलेका दासुन हेमान्था २० बलमा १ चौका र १ छक्कासहित २२ रनमा आउट भए ।

अफगानिस्तानका फजलहक फारुकीले ९ ओभरमा ५८ रन खर्चेर २ विकेट लिए । फरिद अहमदले ८ ओभरमा ४३ रन खर्चेर २ विकेट लिए । आजमतुल्लाह ओमरजाई, मुजिब उर रहमान, नूर अहमद र मोहम्मद नाबीले समान एक विकेट लिए ।