काठमाडौं (हाम्रो खेलकुद) – नेपाल क्रिकेट संघ (क्यान) ले आइसिसी विश्वकप लिग-२ मा हरेक खेलको जितमा खेलाडीलाई जनही २० हजार दिने भएको छ । अघिल्लो महिना सम्पन्न क्यानको विशेष साधरण सभाले उक्त निर्णय गरेको कोषाअध्यक्ष रोशन सिंहले हाम्रो खेलकुदलाई जानकारी दिए ।

नेपालले आइसिसी विश्कप लिग २ मा ३६ खेलमा १९ खेलमा जित, १ मा टाई र १५ खेलमा हार व्यहोेरेको थियो । क्यानले टाईसँग गरि २० खेलमा जितको प्रत्येक खेलाडीलाई जनही २० हजार दिने भएको छ ।

‘हामीले लिग २ मा हरेक खेलमा जितको प्रत्येक खेलाडीलाई २० हजार दिने निर्णय गरेका छौं । २०२० देखी खेलाडीहरु टिममा आउने जाने भएका छन् । नेपालको जितमा हरेक खेलाडीले २० हजारको दरले पाउने छन् । पारस खड्का देखी शरद भेषावकर सम्मका सबै खेलाडीले उक्त रकम पाउने छन्’, सिंहले हाम्रो खेलकुदसँग भने ।

लिग–२ मा पारसले नेपालबाट ४ खेल खेलेका थिए । आइसिसी विश्वकप लिग–२ त्रिकोणात्मक ओडिआई सिरिजमा ओमान र अमेरिकाविरुद्ध २०२० मा टियु मैदानमा खेलेका थिए । पारस खेल्दा नेपालले अमेरिकालाई दुबै खेलमा हराएको थियो । पारसले क्यानको निर्णय अनुसार ४० हजार पाउने छन् ।

यदि कुनै खेलाडी १९ जित र एक टाईमा गरि २० खेलमा खेलमा नै सहभागी छ भने उसले ४ लाख रुपैयाँ पाउनेछ । लिग २ मा खेलाडीले आफू खेल्दा जित अनुसार २० हजारको रुपैयाँले पाउने छन् ।

नेपालले जित्दा बेन्चमा रहेका टोलीका खेलाडीले पनि उक्त रकम पाउनेछन् । २० पुरै खेलमा सहभागी नेपालबाट करण केसी, रोहित पौडेल र दीपेन्द्रसिंह ऐरीले समान ४ लाख पाउनेछन् । यी तीन खेलाडी लिग २ मा नेपालको सबै सिरिजमा सहभागी थिए । नेपालमा ओडिआई प्रत्येक खेलमा खेलाडीको म्याच फि १० हजारको रुपैयाँ छ ।

नेपालले लिग २ मा अन्तिम १२ खेलमा ११ मा जितका साथ शीर्ष तीनमा अन्त्य गरेको थियो । शीर्ष तीनमा अन्त्य गरेसँगै नेपालले आगमी चार वर्षको लागि ओडिआई मान्यता जोगाउनुको साथै जिम्बावेमा हुने विश्वकप छनोटमा सोझै स्थान बनाएको थियो । नेपाल तीन सातापछि जिम्बावेमा हुने विश्वकप छनोटको लागि दक्षिण अफ्रिका अन्तिम तयारी गर्न पुगेको छ ।

विश्वकप छनोट १८ जुन देखि ९ जुलाई सम्म जिम्बावेमा हुनेछ । नेपाल समूह ए मा छ । नेपाल, वेस्टइन्डिज, जिम्बावे, नेदरल्यान्ड्स र अमेरिका समूह ए मा छन् । श्रीलंका, आयरल्यान्ड, स्कटल्यान्ड, युएई र ओमान समूह बी मा छन् ।
समूह चरणबाट शीर्ष तीन टोली सुपर सिंक्समा पुग्नेछन् । सुपर सिक्समा समूह बी बाट आउने तीन टोलीले प्रतिस्पर्धा गर्नेछन् । शीर्ष दुई टोलीले भारतमा हुने एकदिवसीय विश्वकपमा स्थान बनाउने छन् ।