काठमाडौं (हाम्रो खेलकुद) – नेपालले चौथो महिला टि२० आई खेलमा मलेसियाविरुद्ध निकै सुस्त सुरुवात गरेको छ । टस जितेर ब्याटिङ गर्ने निर्णय लिएको नेपालले सुरुवाती ७ ओभर अर्थात ४२ बलमा ३ विकेट गुमाउँदै १३ रन बनाएको छ ।

पावर प्लेको फाइदा उठाउँदै आक्रामक सुरुवात गर्नुको सट्टा नेपालले निकै सुस्त गतिमा ब्याटिङ गरेको हो । नेपालले कुनैपनि चौका र छक्का प्रहार गरेको छैन ।

नेपालकी ओपनर काजोल श्रेष्ठ १३ बलमा ६ र सीता रानामगर १६ बलमा ५ रनमा आउट भइन् । ज्योति पाण्डे ६ बलमा १ रनमा आउट भइन् । कप्तान रुविना क्षेत्री बेलबासे ५ र इन्दु बर्माले २ बल खेल्दा खाता खोलेका छैनन् ।

तीव्र गतिकी बलर आश्मिना कर्माचार्यको स्थानमा अप्सरी बेगमलाई मौका दिएकोछ। पाँच खेलको सिरिजमा नेपाल २(१ ले अघि छ । पहिलो खेल गुमाएपनि त्यसपछि लगातार दुई जितका साथ नेपालले पूनरागमन गरेको थियो ।

नेपाल आजको खेलमा जितका साथ एक खेल अगावै सिरिज जित्न चाहन्छ । नेपाल पहिलो खेलमा ५ विकेटले पराजित भएको थियो । नेपाल दोस्रो खेलमा ७ विकेट र तेस्रो खेलमा २७ रनले विजयी भएको थियो । अन्तिम खेल आइतबार हुनेछ ।

नेपालको प्लेइङ ११ :

रुविना क्षेत्री बेलबासे (कप्तान), सीता रानामगर, इन्दु बर्मा, कविता कुवँर, कविता जोशी, अप्सरी बेगम, विन्दु रावल, काजोल श्रेष्ठ, सम्झना खड्का, ईश्वरी विषट र ज्याति पाण्डे ।