एजेन्सी – घरेलु टोली श्रीलंकाले दोस्रो ओडिआई खेलमा अफगानिस्तानमाथि १ सय ३२ रनको सानदार जित हात पारेको छ । योसँगै तीन ओडिआई खेलको सिरिज १-१ को बराबरी अवस्थामा पुगेको छ ।

जितको लागि ३ सय २४ रनको विशाल विजयी लक्ष्य पछ्याएको अफगानिस्तान ४२.१ ओभरमा १ सय ९१ रनमा अल आउट भयो । अफगानिस्तानका कप्तान हश्मातुल्लाह शाहिदीले ६२ बलमा ६ चौकासहित सर्वाधिक ५७ रन बनाउन सके ।

त्यस्तै ओपनर इब्राहिम जद्रानले ७५ बलमा २ चौका र २ छक्कासहित ५४ तथा आजमतुल्लाह ओमरजाईले ३१ बलमा ४ चौका र १ छक्कासहित २८ रन बनाउँदै आउट भए ।

पहिलो खेलमा पराजित भएपछि श्रीलंकाले आफ्ना प्रमुख बलर मैदान उतार्दा अफगानिस्तानका ७ खेलाडीले दोहोरो अंकमा रन बनाउन सकेनन् । रहमात शाह ४२ बलमा ३ चौकासहित ३६, रहमानउल्लाह गुरबाज, नाजिबउल्लाह जद्रान र मोहम्मद नाबी समान २ रनमा आउट भए ।

श्रीलंकाका स्पिनर वानिन्दु हसरंगाले ९ ओभरमा २ मेडनसहित ४२ रन खर्चेर ३ विकेट लिए । धनन्जय डि सिल्भाले १० ओभरमा ३९ रन खर्चेर ३ विकेट लिए । तीव्र गतिका बलर दुश्मन्था चामिराले ७ ओभरमा १८ रन खर्चेर २ विकेट लिए । महेश थिक्सेना र दासुन शानकाले १-१ विकेट लिए ।

त्यसअघि टस जितेर पहिला ब्याटिङ रोजेको श्रीलंकाले निर्धारित ५० ओभरमा ६ विकेट गुमाउँदै ३ सय २३ रन बनाएको थियो । श्रीलंकाको जितमा शीर्षक्रमका युवा ब्याटर कुशल मेन्डिसले ७५ बलमा ७ चौका र १ छक्कासहित सर्वाधिक ७८ रनको योगदान दिए ।

उनी तीव्र गतिका बलर फरिद अहमदको बलमा विकेटकिपर रहमानउल्लाह गुरबाजबाट क्याच आउट हुँदै पेभेलिएन फर्केका थिए । त्यस्तै दिमुथ करुणारत्ने ६२ बलमा ७ चौकासहित ५२ रनमा आउट भए ।

श्रीलंकालाई ओपनर पाथुम निसंका र करुणारत्नेले १५.५ ओभरमा ८२ रन जोड्दै राम्रो सुरुवात दिलाएका थिए । निसांका ५६ बलमा ६ चौकासहित ४३ रनमा मोहम्मद नाबीको बलमा एलबीडब्लू आउट भए । सदिरा समाराविक्रमा ४६ बलमा ५ चौकासहित ४४, चरिथ असलंका ६ र दासुन शानका २३ रनमा आउट भए ।

वानिन्दु हसरंगा १२ बलमा ४ चौका र १ छक्कासहित २९ रनमा नटआउट रहे । धनन्जय डि सिल्भा २४ बलमा १ चौका र १ छक्कासहित २९ रनमा नटआउट रहे ।

अफगानिस्तानका मोहम्मद नाबी र फरिद अहमदले समान दुई विकेट लिए । मुजिब उर रहमान र नूर अहमदले समान एक विकेट लिए । तेस्रो खेल बुधबार हुनेछ । श्रीलंकाले तीन सातापछि जिम्बावेमा हुने विश्वकप छनोटको तयारी स्वरुप अफगानिस्तानसँग सिरिज खेलेको हो ।

पहिलो खेलमा भने ६ विकेटले पराजित भएकोे थियो । पहिलो खेलमा विश्राम दिएका दुश्मन्था चामिरा, वानिन्दु हसरंगा र महेश थिक्सेनालाई यस खेलमा मैदान उतारेको थियो । मथिसा पाथिराना, लाहिरु कुमारा र दुशान हेमान्थालाई बेन्चमा राखेको थियो ।