काठमाडौं (हाम्रो खेलकुद) – नेपाली क्रिकेट टोलीका मुख्य प्रशिक्षक मोन्टी देशाईको भिसा नआउँदा दक्षिण अफ्रिका भ्रमणमा जान पाएका छैनन् । नेपाली क्रिकेट टोली आइसिसी विश्वकप एकदिवसीय छनोटको लागी अन्तिम तयारी गर्न एक हप्ता अघि दक्षिण अफ्रिका जादा मोन्टी भने भिसाको कारण जान पाएका छैनन् ।

क्यानका कार्यवाहक सचिव दुर्गाराज पाठकले मंगलबार बिहानसम्म मोन्टीको भिसा नआएको जानकारी दिएका छन् । मोन्टीको भिसा आजसम्म आउने सम्भावना रहेको पाठकले बताए । यदि मोन्टीको भिसा आज आएमा उनलाई क्यानले आज रातीनै दक्षिण अफ्रिकातर्फ पठाउने तयारी गरेको पाठकले बताएका छन् ।

मोन्टी एसिसी प्रिमियर कपमा नेपाल च्याम्पियन बनेपछि बिदामा अमेरिका गएका थिए । उनले अमेरिकाबाट भिसाको प्रक्रिया गरेपनि त्यहाँबाट सफल हुन सकेको थिएन । त्यसपछि उनी बुधबार भारत फर्किएका थिए । भारतबाट पुन भिसा प्रक्रिया गरेपनि आउन ढिलो गरेको हो ।

नेपाली क्रिकेट टोलीका स्पिनर सन्दीप लामिछाने भने आज रात साढे दुई बजेत्यसतर्फ लागेका छन् । बलात्कार आरोपको कारण सर्वोच्च अदालतमा पेशी आगमी असार २९ सम्मलाई सरेपछि उनी दक्षिण अफ्रिकातर्फ लागेका हुन् । अदालतमा पेशी हुँदा सन्दीप पनि नेपाली टोलीसँगै दक्षिण अफ्रिका जान पाएका थिएनन् । नेपालले ८ जुनमा स्कटल्यान्डसँग दक्षिण अफ्रिकामा वार्मअप खेल खेल्नेछ । दक्षिण अफ्रिकामा नेपालले १० जुनमा नेदरल्यान्ड्ससँग वार्मअप खेल खेल्नेछ । त्यसपछि नेपाल जिम्बावे जानेछ ।

जिम्बावेमा विश्वकप छनोट खेल्नुअघि नेपालले १३ जुनमा युएई र १५ जुनमा ओमानसँग वार्मअप खेल खेल्नेछ । प्रतियोगिता १८ जुन देखि ९ जुलाई सम्म हुनेछ । नेपाल, वेस्टइन्डिज, जिम्बावे, अमेरिका र नेदरल्यान्ड्स समूह ए मा छन् । समूह बी मा श्रीलंका, आयरल्यान्ड, स्कटल्यान्ड, ओमान र युएई छन् । नेपालले १८ जुनमा जिम्बावेसँग खेल्दै सुरुवात गर्नेछ ।

हरेक समूहबाट शीर्ष तीन टोली सुपर सिक्समा प्रवेश गर्नेछन् । सुपर सिक्समा समूह बी बाट आउने तीन टोलीले समूह ए का तीन टोलीसँग खेल्नेछन् । त्यसपछि शीर्ष दुई टोली फाइनलमा पुग्दै भारतमा हुने विश्वकपमा स्थान बनाउनेछन् ।