एजेन्सी – तीव्र गतिका बलर दुश्मन्था चामिराको उत्कृष्ट बलिङसँगै अफगानिस्तानले तेस्रो तथा निर्णायक खेलमा घरेलु टोली श्रीलंकालाई १ सय १७ रनको सामान्य लक्ष्य दिएको छ । टस जितेर पहिला ब्याटिङ रोजेको अफगानिस्तान २२.२ ओभरमा १ सय १६ रनमा अल आउट भयो ।

अफगानिस्तानका मोहम्मद नाबीले २३ बलमा २ चौकासहित सर्वाधिक २३ रनको योगदान दिए । उनी चामिराकै बलमा एलबीडब्लू आउट भएका थिए । लाहिरु कुमाराको दोस्रो ओभरको अन्तिम बलमा रहमानउल्लाह गुरबाज ८ रनमै क्याच आउट भए । त्यसपछि चामिराले पाँचौं ओभरमा रमात शाहलाई ७ र कप्तान हश्मातुल्लाह शाहिदीलाई ४ रनमा विकेटकिपर कुशल मेन्डिसबाट क्याच आउट गराएका थिए ।

इब्राहिम जद्रान २१ बलमा ४ चौकासहित २२ रनमा लाहिरु कुमाराको बलमा एलबीडब्लू आउट भएका थिए । अफगानिस्तानले लगातार विकेट गुमायो । कुनैपनि ब्याटरले क्रिजमा टिकेर रन जोड्न सकेनन् । गुलबदीन नाइब २१ बलमा ४ चौकासहित २०, राशिद खान २, मुजिब उर रहमान डक र फजलहक फारुकीले ४ रनमा आउट भए ।

श्रीलंकाका दुश्मन्था चामिराले ९ ओभरमा ६३ रन खर्चेर ४ विकेट लिए । वानिन्दु हसरंगाले ४.२ ओभरमा १ मेडनसहित ७ रन खर्चेर ३ विकेट लिए । लाहिरु कुमाराले २ र महेश थिक्सेनाले एक विकेट लिए । तीन खेलको सिरिज १-१ को अवस्थामा छ । पहिलो खेलमा अफगानिस्तान ६ विकेटले विजयी हुँदा दोस्रो खेलमा १ सय ३२ रनले पराजित भएको थियो ।