एजेन्सी – घरेलु टोली श्रीलंकाले तेस्रो ओडिआई खेलमा अफगानिस्तानलाई ९ विकेटले हराउँदै सिरिज उपाधि जितेको छ । योसँगै श्रीलंकाले तीन खेलको ओडिआई सिरिज २-१ ले जितेको छ ।

जितको लागि १ सय १७ रनको विजयी लक्ष्य पछ्याएको श्रीलंकाले १६ ओभरमा १ विकेट गुमाउँदै पूरा गर्यो । श्रीलंकाको जितमा अनुभवी खेलाडी दिमुथ करुणारत्ने ४५ बलमा ७ चौकासहित ५६ रनमा नटआउट रहे ।

ओपनर पाथुम निसांका ३४ बलमा ८ चौका र २ छक्कासहित ५१ रनमा आउट भए । कुशल मेन्डिसन १७ बलमा १ चौकासहित ११ रनमा नटआउट रहे । अफगानिस्तानका गुलबदीन नाइबले एक विकेट लिए ।

त्यसअघि टस जितेर पहिला ब्याटिङ रोजेको अफगानिस्तान २२.२ ओभरमा १ सय १६ रनमा अल आउट भएको थियो । श्रीलंकाको बलिङ आक्रामण सामु अफगानी कुनैपनि ब्याटरले राम्रो प्रदर्शन गर्न सकेनन् ।

अनुभवी अलराउन्डर मोहम्मद नाबीले २३ बलमा २ चौकासहित सर्वाधिक २३ रन बनाए । उनी चामिराकै बलमा एलबीडब्लू आउट भएका थिए । लाहिरु कुमाराको दोस्रो ओभरको अन्तिम बलमा रहमानउल्लाह गुरबाज ८ रनमै क्याच आउट भएका थिए । त्यसपछि चामिराले पाँचौं ओभरमा रमात शाहलाई ७ र कप्तान हश्मातुल्लाह शाहिदीलाई ४ रनमा विकेटकिपर कुशल मेन्डिसबाट क्याच आउट गराउँदै खेलमा पुरै हाबी बनाएका थिए ।

इब्राहिम जद्रान २१ बलमा ४ चौकासहित २२ रनमा लाहिरु कुमाराको बलमा एलबीडब्लू आउट भएका थिए । अफगानिस्तानले लगातार विकेट गुमाउन पुग्यो । कुनैपनि ब्याटरले क्रिजमा टिकेर रन जोड्न सकेनन् । गुलबदीन नाइब २१ बलमा ४ चौकासहित २०, राशिद खान २, मुजिब उर रहमान डक र फजलहक फारुकीले ४ रनमा आउट भएका थिए ।

श्रीलंकाको जितमा दुश्मन्था चामिराले ९ ओभरमा ६३ रन खर्चेर ४ विकेट लिए । वानिन्दु हसरंगाले ४.२ ओभरमा १ मेडनसहित ७ रन खर्चेर ३ विकेट लिएका थिए । लाहिरु कुमाराले २ र महेश थिक्सेनाले एक विकेट लिए । पहिलो खेलमा अफगानिस्तान ६ विकेटले विजयी हुँदा दोस्रो खेलमा १ सय ३२ रनले पराजित भएको थियो ।

श्रीलंकाले दुई सातापछि जिम्बावेमा हुने आइसिसी विश्वकप छनोटअघि अफगानिस्तानसँग सिरिज खेलेको हो । उपाधि दाबेदार श्रीलंका, आयरल्यान्ड, स्कटल्यान्ड, ओमान र युएई समूह बी मा छन् । समूह ए मा नेपाल, वेस्टइन्डिज, जिम्बावे, नेदरल्यान्ड्स र अमेरिका छन् । प्रतियोगिता १८ जुन देखि ९ जुलाई सम्म हुनेछ ।