एजेन्सी – उपकप्तान स्टिभ स्मिथ र ट्रविस हेडको सानदार ब्याटिङसँगै अष्ट्रेलियाले आइसिसी विश्व टेस्ट च्याम्पियनसिप २०२३ को फाइनलमा भारतविरुद्ध पहिलो दिननै विशाल योगफलको आधार तय गरेको छ ।

इंग्ल्यान्डको द ओभलमा टस हारेर पहिला ब्याटिङको निम्तो पाएको अष्ट्रेलियाले ८५ ओभरमा ३ विकेट गुमाउँदै ३ सय २७ रन बनाउँदा पहिलो दिनको खेल सकिएको छ । अष्ट्रेलियाका मध्यक्रमका ब्याटर ट्रविस हेड १ सय ५६ बलमा २२ चौका र १ छक्कासहित १ सय ४६ रनमा नटआउट छन् । हेडले विश्व टेस्ट च्याम्पियनसिपको फाइनलमा शतक हान्ने पहिलो खेलाडी बन्ने दुर्लभ इतिहास रचेका छन् ।

पहिलो संस्करणको २०२१ को फाइनलमा भारतविरुद्ध न्युजिल्यान्डका डेभन कन्वेले ५४ र केन विलियम्सनले ५२ रन बनाएका थिए । हेडले १ सय ६ बलमा आफ्नो टेस्ट करिअरको छैटौं शतक पूरा गरेका थिए ।

वर्तमान समयका विश्व क्रिकेटकै एक उत्कृष्ट ब्याटर स्टिभ स्मिथ २ सय २७ बलमा ९५ रनमा नटआउट छन् । उनले अर्को एण्डबाट हेडलाई उत्कृष्ट साथ दिएका छन् । हेड आक्रामक रुपमा प्रस्तुत हुँदा स्मिथ संयमितका साथ भारतलाई दबाबमा राखेका छन् । स्मिथ आफ्नो टेस्ट करिअरको ३१ औं शतक गर्न मात्रै पाँच रन टाढा छन् ।

अष्ट्रेलियाको सुरुवात भने केहि कमजोर रहेको थियो । एक समय २४.१ ओभरमा ७६-३ को अवस्थामा पुगेको अष्ट्रेलियालाई चौथो विकेटका लागि स्मिथ स्मिथ र हेडले २ सय ५१ रनको नटआउट दोहोरो शतकीय साझेदारी गरेपछि भारत निरिह बन्न पुगेको हो ।

तीव्र गतिका बलर मोहम्मद शिराजले उच्च लयमा रहेका ओपनर उस्मान खवाजालाई शून्यमा आउट गर्दै भारतलाई राम्रो सुरुवात दिलाएका थिए । खवाजा चौथो ओभरको चौथो बलमा एज लागेर विकेटकिपर केएस भरतबाट समातिन पुगे । दोस्रो विकेटका लागि मार्नस लाबुसेन र डेविड वार्नरले ६९ रनको साझेदारी गर्दै खेलमा फर्काएका थिए ।

पहिलो दिन भोजन अघि डेविड वार्नर ६० बलमा ८ चौकासहित ४३ रनमा आउट हुन पुगे । वार्नर तीव्र गतिका बलर शार्दुल ठाकुरको बलमा एज लागेर विकेटकिपर भरतबाट नै समातिएका थिए ।

भोजन लगत्तै मार्नस लाबुसेन मोहम्मद शामीको बलमा २६ रनमा बोल्ड भएपछि अष्ट्रेलिया ७६-३ को अवस्थामा पुगेको थियो । लाबुसेनले ६२ बलमा ३ चौका प्रहार गरे । त्यसपछि भने भारतले विकेट लिन सकेन । दोस्रो दिन खेल दिउँसो ३: १५ देखि सुरु हुनेछ ।