काठमाडौं (हाम्रो खेलकुद) – नेपालले पहिलो पहिलो एकदिवसीय अभ्यास खेलमा स्कटल्यान्डलाई १ सय ३६ रनको सामान्य लक्ष्य दिएकोछ । टस हारेर पहिला ब्याटिङको निम्तो पाएको नेपाल २८.५ ओभरमा १ सय ३५ रनमा अल आउट भयो ।

नेपालका लागि कुशल मल्लले २६ बलमा ४ चौका र २ छक्कासहित सर्वाधिक ३७ रनको योगदान दिए । अन्य कुनैपनि नेपाली ब्याटरले राम्रो प्रदर्शन गर्न सकेनन् ।

नेपालका ओपनर आसिफ शेख ३६ बलमा ५ चौकासहित २८ रनमा आउट भए । अर्का ओपनर कुशल भुर्तेल २४ बलमा २ चौकासहित १६ रन बनाउँदै क्याच आउट भएका थिए । कुशल तीव्र गतिका बलर शफ्यान शरिफको बलमा स्लिपमा जर्ज मुन्शेबाट क्याच आउट हुन पुगेका थिए । नेपाललाई ओपनर आसिफ शेख र कुशल भुर्तेलले ८.१ ओभरमा ३६ रनको साझेदारी गरेका थिए ।

तेस्रो नम्बरमा आएका भीम सार्की १० बलमा १ चौकासहित ८ रनमा क्याच आउट हुन पुगे । भीम एड्रियन निलको बलमा मुन्शेबाट क्याच आउट भए ।

१४ औं ओभरको पहिलो बलमा ज्याक जार्विसले आसिफलाई बोल्ड आउट गरे । लगत्तै अर्को बलमा कप्तान रोहित पौडेल गोल्डेन डक आउट भएका थिए । ज्ञानेन्द्र मल्ल १७ बलमा ७ रन बनाउँदै क्याच आउट भए ।

कुशल मल्ल ज्याक जार्विसको २१ औं ओभरको अन्तिम बलमा ठूलो सट खेल्ने धुनमा टप एज लागेर क्याच आउट भएका हुन् । दीपेन्द्रसिंह ऐरी एज लागेर विकेटकिपर म्याथ्यु क्रसबाट १३ रनमा क्याच आउट भए । सोमपाल कामी ३, गुलशन झा र आरिफ शेख समान ५ रनमा आउट भए । करण केसी ४ रनमा नटआउट रहे ।

स्कटल्यान्डका ब्रेन्डन म्याकुमलनले ५ ओभरमा २३ रन खर्चेर ३ विकेट लिए । ज्याक जार्विसले ३ ओभरमा ३८ रन खर्चेर ३ विकेट लिए । शफ्यान शरिफले दुई, निल र हम्जा ताहिरले समान एक विकेट लिए ।