एजेन्सी – युवा ब्याटर एलिक एथानाजेको विश्व कीर्तिमानी ब्याटिङसँगै वेस्टइन्डिजले तेस्रो ओडिआई खेलमा युएईलाई ४ विकेटले हराउँदै सिरिज जितेको छ । तीन खेलको ओडिआई सिरिज वेस्टइन्डिजले क्लिनस्वीप गरेको हो ।

जितको लागि १ सय ८५ रनको विजयी लक्ष्य पछ्याएको वेस्टइन्डिजले ३५.१ ओभरमा ६ विकेट गुमाउँदै पूरा गर्यो ।वेस्टइन्डिजको जितमा डेब्यू खेल खेलेका २४ वर्षीय एलिक एथानाजेले ४५ बलमा ९ चौका र ३ छक्कासहित सर्वाधिक ६५ रनको योगदान दिए ।

उनले २६ बलमा अर्धशतक पूरा गरेका थिए । उनले ओडिआई क्रिकेटमा डेब्यू खेलमा सर्वाधिक छिटो अर्धशतकको कीर्तिमान बराबर गरेका छन् । उनले भारतीय अलरान्डर क्रुनाल पान्ड्यासँग उक्त कीर्तिमान बराबर गरेका हुन् । शमाह्र ब्रुस ३९, केसी कार्टी २० र कप्तान रोस्टन चेशले २७ रन बनाए । युएईका आयन खान, मोहम्मद जवादुल्लाह र कार्तिक मयाप्पनले समान दुई विकेट लिए ।

त्यसअघि शारजाह क्रिकेट स्टेडियममा टस जितेर पहिला ब्याटिङ रोजेको युएई ३६.१ ओभरमा १ सय ८४ रनमा अल आउट भयो । युएईका वृत्य अरविन्दले ७५ बलमा ८ चौका र १ छक्कासहित ७० रनमा आउट भए ।

कप्तान मोहम्मद वासिम ३४ बलमा ५ चौका र २ छक्कासहिति ४२ रनमा आउट भए । एक समय युएई १४२–२ को बलियो अवस्थामा थियो । तर रमिज शाहजाद २७ रनमा केविन सिन्क्लेयरको बलमा कट एन्ड बोल्ड आउट भएपछि लगातार विकेट गुमाएको थियो ।

डेब्यू खेल खेलेका इथान डि सोल्झा ६ र रोहन मुस्ताफा ५ रनमा एलबीडब्लू आउट भए । अली नासिर १३ र आयन खान २ रनमा आउट भए ।

वेस्टइन्डिजका केविन सिन्क्लेयरले ७.१ ओभरमा २४ रन खर्चेर सर्वाधिक ४ विकेट लिए । यानिक कारियहले दुई विकेट लिए । वेस्टइन्डिज पहिलो खेलमा ७ विकेट र दोस्रो खेलमा ७८ रनलो विजयी भएको थियो । एक सातापछि जिम्बावेमा हुने विश्वकप छनोट अघि युएईले वेस्टइन्डिजसँग तीन खेलको सिरिज खेलेको हो ।