काठमाडौं (हाम्रो खेलकुद) – नेपाली क्रिकेट टोलीका एक सर्वाधिक सफल खेलाडी शक्ति गौचनले आफू मर्नुअघि नेपाल टेस्ट राष्ट्र बनेको हेर्न सपना रहेको बताएका छन् । भैरहवामा रहेको स्टार एकेडेमीमा खेलाडी उत्पादन गर्न ब्यस्त रहेका शक्तिले हाम्रो खेलकुद डटकमसँग अन्तर्वार्तामा बोल्नेक्रममा उक्त प्रतिक्रिया दिएका हुन् ।

आफ्नो लक्ष्य नेपाललाई टेस्ट नेशन भएको हेर्न रहेको बताए । ‘मेरो एउटा मिसननै छ । मर्नु अघि नेपाल टेस्ट नेशन भएको हेर्न पाउँ । साथीभाइहरु पनि तपाई यतिकै लागि राख्नु भएको छ भन्छन् । म अस्ति पोखरामा पनि गएको थिए । ठिकै छ १५/२० वर्षपछि नपाउला । ३० वर्षपछि पाउँला । तपाईं ८० वर्षको हुँदा पाउला । ठिकै छ नेपालले टेस्ट मान्यता पाउँदा म ८० वर्षको हुला, शक्तिले टेस्ट सपना बारे भने ।

त्यसैमा थपे, ‘मलाई हिँड्न गाह्रो होला रे । कसैले मलाई समातेर मैदानमा नेपालको टेस्ट खेल हेर्न लैजाला। मैदानमा पुगेर जव मैले त्यो अनुभव गर्छु नि । त्यो आनन्द जुन हुन्छ नि त्यो फरक नै हुनेछ । मैले त्यति बेला पोखरामा त्यहिँ भनेको थिए,।’

तत्काल शक्तिले नेपालको प्रशिक्षकमा ध्यान नदिएको बताएका छन् । ‘यू१९ वा सिनियर टोलीको प्रशिक्षकको जिम्मेवारी आएमा त्यतातिर मैले अहिले खासै ध्यान दिएको छैन । यहाँ त अहिले जिल्लाको प्रशिक्षकको पनि जिम्मेवारी आएको छैन । अहिले मेरो ध्यान आफ्नो एकेडेमी र एक्ट्राटेक ओभल मैदानले दिएको जिम्मेवारीमा केन्द्रितछु । आगमी दिनमा भयो भने बिचार गरौंला’, शक्तिले हाँस्दै भने । त्यसैमा उनले थपे, ‘जिल्लामा जतिपनि क्षमतावान् खेलाडी छन् । तिनीहरुलाई धेरै भन्दा धेरै समय दिन सकुम् । त्यहिँ नै अहिलेको लक्ष्य छ।’

शक्ति एउटा राम्रो क्षमता भएको खेलाडी जिल्लाको स्तरमा आउन तीन देखी पाँच बर्षसम्म लाग्ने बताए । ‘मैले अहिले १० वर्षदेखी बच्चाहरुलाई लिन सुरु गरेको छु । पहिला हामी १२ वर्षदेखी सुरु गथ्र्यौ । मेरो प्रशिक्षणको अनुभवले एउटा राम्रो क्षमता भएको खेलाडी जिल्लास्तरमा आउन तीनदेखी पाँच वर्ष लाग्छ । जस्तै १२ वर्षदेखी सुरु गयौं भने उसले १०/१६ वर्षदेखी देखिन थाल्छ । उसले नेपालमा प्रतिस्पर्धाको हिसाबले दुई घण्टा राम्रो अभ्यास गर्दा पुग्छ, शक्तिले एउटा खेलाडी तयार बारे भने ।

‘शक्तिसँगको विशेष पूरा अन्तर्वार्ता हेर्नुहोस्’ :