एजेन्सी ( अमेरिका तीव्र गतिका बलर अली खानले आइसिसी एकदिवसीय वार्मअप खेलमा श्रीलंकाविरुद्ध खराब बलिङ गर्दै एक सय भन्दा बढी रन खर्चिएका छन् । अमेरिका श्रीलंकासँग १ सय ९८ रनले पराजित हुन पुग्यो ।

जिम्बावेको बुलायो एथ्लेटिक क्लबमा टस हारेर पहिला ब्याटिङको निम्तो पाएको श्रीलंकाले निर्धारित ५० ओभरमा ५ विकेट गुमाउँदै ३ सय ९२ रन बनाएको थियो ।

श्रीलंकाका कुशल मेन्डिसले ९१ बलमा ७ चौका र ६ छक्कासहित १ सय ५ रन बनाए । दिमुथ करुणारत्नेले १ सय बलमा १५ चौकाहित सर्वाधिक १ सय ११ रनमा रिटायर्ट आउट भए । चरिथ असलंका ३७ बलमा ५ चौका र ४ छक्कासहित ६२ रनमा नट आउट रहे । कप्तान दासुन शानका ३० बलमा ७ चौका र २ छक्कासहित ६१ रनमा नट आउट भए ।

अमेरिका तीव्र गतिका बलर अली खानले १० ओभरमा १ सय २ रन खर्चेर १ विकेट लिए । सौरभ नेत्रवालकरले ९ ओभरमा ६० रन खर्चेर २ विकेट लिए । अली खानले भने एकसय माथि रन खर्चिन पुगे ।

प्रतिबन्धका कारण तीव्र गतिका बलर अली खानले सुरुवाती दुई खेल नेपाल र वेस्टइन्डिजसँगको खेल खेल्न पाउने छैनन् । दुई महिना अघि महिना प्लेअफ क्वालिफायरमा जर्सीका खेलाडीविरुद्ध खेल भावनाविपरित व्यवहार गरेपछि प्रतिबन्धमा परेका थिए । २४ महिना भीत्र ४ डेमिलिट प्वाइन्टका कारण अली खानले दुई खेल प्रतिबन्ध खेप्नु परेको थियो ।

उनले जिम्बावे र नेदरल्यान्ड्ससँगको अन्तिम दुई खेल भने खेल्न पाउनेछन् । गतवर्ष आइसिसी विश्वकप लिग २ को समयमा उनले नेपाली दशर्कलाई संसारकै खराब बताएका थिए ।

अमेरिका, नेपाल, वेस्टइन्डिज, जिम्बावे र नेदरल्यान्ड्स समूह ए मा छन् । समूह बी मा श्रीलंका, आयरल्यान्ड, स्कटल्यान्ड, युएई र ओमान छन् । प्रतियोगिता जुन १८ देखि जुलाई ९ सम्म जिम्बावेमा हुनेछ । शीर्ष तीन टोली सुपर सिक्समा स्थान बनाउनेछन् ।

अमेरिका टोली :

मोनांक पटेल (कप्तान तथा विकेटकिपर), आरोन जोन्स (उपकप्तान), शयान जहाँगिर, नोस्थुश केंजिगे, अली खान, सुशान्त मोदानी, साई मुकामल्ला, सौरभ नेत्रवालकर, अभिषेक परादकर, निसर्ग पटेल, कायल फिलिप, उस्मान रफिक, गजानन्द सिंह, जेसी सिंह र स्टिभ टेलर ।