काठमाडौं (हाम्रो खेलकुद) – नेपालले एसिसी वुमन्स इमर्जिङ टिम्स एसिया कपको अन्तिम खेलमा शनिबार घरेलु टोली हङकङसँग खेल्दैछ । खेल नेपाली समय अनुसार शनिबार बिहान ६: ४५ मा हुनेछ । नेपाल पहिलो खेलमा पाकिस्तानसँग ९ रनले पराजित हुँदा भारतसँग वर्षाको कारण अंक बाँडेको थियो ।

नेपाल २ खेलमा १ मा हार १ खेलमा अंक बाँड्दै तेस्रो स्थानमा छ । भारत र पाकिस्तान भने समान दुई खेलमा एक मा जित र एक खेलमा अंक बाँड्दै ३–३ अंकका साथ शीर्ष र दोस्रो स्थानमा छन् । उता हङकङ भने २ खेलमा एक खेलमा हार र एक खेलमा अंक बाँड्दै १ अंकका साथ पुछारमा छ । भारतको नेटरनरेट ५.४२५ छ । उक्त नेटरनरेट भेटाउन असम्भव जस्तैछ ।

त्यसैले भारतको सेमिफाइनल अनौपचारिकताछ । पाकिस्तानको नेटरनरेट ०.४५० र नेपालको माइनस ०.४५० छ । नेपाल सेमिफाइनलमा पुग्न पहिला शनिबार घरेलु टोली हङकङमाथि विशाल जितको आवश्यक पर्दछ । पाकिस्तानलाई नेटरनरेटमा पछिपार्न सक्नुपर्छ । नेपालको नेटरनरेट माइनसमा हुँदा सामान्य जितले भने पर्याप्त हुनेछैन । यदि हङकङमाथि फराकिलो जित हात पारेको खण्डमा नेपालको भविष्य भारतको हातमा हुनेछ ।

भारत र पाकिस्तानबीच शनिबार दोस्रो खेल हुनेछ । उक्त खेलमा पाकिस्तान विजयी हुँदा नेपालको सम्भावना सकिने देखिन्छ । त्यसैले नेपाललाई पाकिस्तानको हार आवश्यक पर्दछ । पाकिस्तान पराजित हुँदा नेपाल सेमिफाइनलमा पुग्नसक्छ । अथवा नेपाल अन्तिम खेलमा सामान्य अन्तरले विजयी हुँदा र पाकिस्तान भारी अन्तरले पराजित भएमा सेमिफाइनलमा पुग्न सक्छ । नेपाल पराजित भएमा भने स्वत बाहिरिनेछ ।

समूह बी मा बंगलादेश ३ खेलमा २ मा जित र १ मा हारसहित ४ अंकका साथ शीर्ष स्थानमा रहँदै सेमिफाइनलमा पुगेको छ । श्रीलंका ३ खेलमा २ मा जित र १ मा हारसहित ४ अंक भएपनि नेटरनरेटको कारण दोस्रो स्थानमा रहँदै सेमिफाइनलमा पुगेको छ ।

सेमिफाइनलमा श्रीलंकाले समूह ए को विजेता र बंगलोदशले समूह ए को उपविजेतासँग खेल्नेछ । समूह बी मा युएई ३ खेलमा समान १ मा जित, नजिता विहीन र हारका साथ ३ अंकका साथ तेस्रो स्थानमा रहेर बाहिरियो । मलेसिया भने ३ खेलमा २ मा हार र १ खेलमा नतिजा विहीन हुँदै बाहिरियो ।

नेपाल र हङकङबीच तीन डब्लूटि२० आई खेल भएका छन् । नेपाल एक खेलमा मात्रै विजयी भएको छ । गतवर्ष जुनमा एसिसी वुमन्स टि२० च्याम्पियनसिपमा नेपाल हङकङसँग ७ विकेटले पराजित भएको थियो । जितको लागि १ सय १० रनको विजयी लक्ष्य हङकङले १५.५ ओभरमा ३ विकेट गुमाउँदै पूरा गरेको थियो । पछिल्ला दुबै खेलमा नेपाल हङकङसँग पराजित हुन पुगेको थियो ।

हङकङकी मारिको हिल स्टार ब्याटर हुन् । उनको विकेट नेपालको लागि निकै महत्वपूर्ण हुनेछ । उनले ३९ डब्लूटि२० आई ७ सय ५५ रन बनाएकी छिन् । नताशा मिल्स र कप्तान क्यारी चान पनि प्रमुख ब्याटर हुन् । यता नेपाली महिला खेलाडीको फिटनेश प्रमुख समस्या हो ।

पहिलो खेलमा पाकिस्तानलाई ८७ रनमा अल आउट गरेर उक्त लक्ष्य पूरा गर्न सकेको थिएन । त्यसको मुख्य कारण फिटनेश थियो । नेपालकी कविता कुँवरले पाकिस्तानविरुद्ध लगातार योर्कर फ्याँलेकी थिइन् । उनीबाट नेपाल त्यस्तै प्रदर्शन चाहन्छ । कप्तान रुविना र अनुभवी खेलाडी सीता रानामगरबाट नेपाल उत्कृष्ट ब्याटिङ चाहन्छ ।